Health Issues: ఈ ఆరోగ్య సమస్యలను గూగుల్ లో తెగ వెతికేస్తున్నారు.. ఫస్ట్ ప్లేస్ లో ఏముందో తెలుసా..?

Health Issues: 2025లో భారత ప్రజలు గూగుల్‌లో చేసిన సెర్చ్‌లను పరిశీలిస్తే (Most Searched Health Issues on Google 2025), ఆరోగ్యంపై ఉన్న ఆందోళన ఎంతగా పెరిగిందో స్పష్టంగా తెలుస్తుంది. కాలుష్యం పెరగడం, కొత్త వైరస్‌లు రావడం, జీవనశైలిలో మార్పులు కారణంగా తలెత్తుతున్న వ్యాధులు... ఇవన్నీ ప్రజలను ఇంటర్నెట్ వైపు మరింతగా మళ్ళిస్తున్నాయి. చిన్న చిన్న సమస్యల నుంచి, తీవ్రమైన లక్షణాల వరకు, చాలామంది మొదట గూగుల్‌లోనే వివరాలు తెలుసుకోవడానికి ప్రయత్నిస్తున్నారు.

తలనొప్పి - దేశవ్యాప్తంగా అత్యధికంగా సెర్చ్ చేసిన లక్షణం

ఈ ఏడాది భారతదేశంలో అత్యధికంగా గూగుల్‌లో వెతికిన లక్షణం తలనొప్పి. సాధారణంగా ఒత్తిడి, జలుబు లేదా సైనస్‌తో తలనొప్పి వస్తుంది. కానీ దీర్ఘకాలం తగ్గని లేదా తీవ్రమైన తలనొప్పి మైగ్రేన్ లేదా నాడీ సంబంధిత సమస్యల సూచన కూడా కావచ్చు. అందుకే చాలా మంది తలనొప్పి కారణాలు, ఉపశమన మార్గాల కోసం ఇంటర్నెట్‌ను ఆశ్రయించారు.

ఇది కూడా చదవండి: మౌని అమావాస్య ప్రత్యేకత.. అమృత స్నానం, మౌనవ్రతంతో పుణ్య ఫలం గురించి తెలుసుకోండి!!

జ్వరం - ఇంకా ప్రజలు ఎక్కువగా సెర్చ్ చేసే లక్షణం

జ్వరం ఎప్పుడూ శరీరంలో ఇన్ఫెక్షన్ ఉన్నప్పుడు కనిపించే మొదటి సంకేతం. అధిక జ్వరం న్యూమోనియా వంటి తీవ్రమైన సమస్యలను సూచిస్తుండగా, తక్కువ జ్వరం సాధారణంగా వైరల్ ఫీవర్ లేదా శరీరంలో స్వల్ప వాపును సూచిస్తుంది. అందుకే జ్వరం గురించి సెర్చ్‌లు సంవత్సరంతా కొనసాగాయి.

శ్వాస సమస్యలు - కాలుష్యం పెరగడం కారణంగా సెర్చ్‌లు బాగా పెరిగాయి

2025లో ప్రజలు అత్యధికంగా వెతికిన లక్షణాల్లో దగ్గు, ఉబ్బసం, శ్వాస తీసుకోవడంలో ఇబ్బంది ప్రధానంగా ఉన్నాయి. కఫం దగ్గు సాధారణంగా ఇన్ఫెక్షన్‌ను సూచిస్తుంది. శ్వాస తీసుకోవడంలో ఇబ్బంది ఆస్తమా, న్యూమోనియా, హృదయ సమస్యలు లేదా కొన్నిసార్లు ఆందోళన వంటి కారణాల వల్ల రావొచ్చు. ఈ కారణంగా ఈ సెర్చ్‌లు పెరిగాయి.

అలసట - ఎందుకు వస్తోందో తెలుసుకోవడానికి అనేక మంది సెర్చ్ చేశారు

ఎల్లప్పుడూ అలసటగా ఉండటం అనే లక్షణం ఈ ఏడాది మరింత ఎక్కువగా సెర్చ్ చేసారు. దీని వెనుక ఉన్న కారణాలు రక్తహీనత, నిద్ర సమస్యలు, థైరాయిడ్, దీర్ఘకాలిక వ్యాధులు ఇవన్నీ ఉండవచ్చు. అందుకే ప్రజలు గూగుల్‌లో ఈ సమాచారం కోసం ఎక్కువగా వెతికారు.

గొంతు నొప్పి, ముక్కు కారడం, వైరస్‌ల వల్ల సెర్చ్‌లు పెరిగాయి

కొత్త కోవిడ్ వేరియంట్లు, సీజనల్ జలుబు, ఇన్ఫెక్షన్‌ల కారణంగా గొంతు నొప్పి, ముక్కు బ్లాక్ అవడం, ముక్కు కారడం లాంటి లక్షణాలకు సంబంధించిన సెర్చ్‌లు పెరిగాయి. శరీరం నొప్పులు, కడుపు సమస్యలు అన్ని వయసుల వారు వెతికినవి. సాధారణ శరీరం నొప్పులు, జ్వరం కారణంగా వచ్చే బలహీనత, విరేచనాలు, కడుపు నొప్పి, వికారం వంటి కడుపు సమస్యల గురించి కూడా ఎక్కువగా సెర్చ్ చేశారు. ఇవి ఫుడ్ పాయిజన్, అసిడిటీ లేదా కడుపు సంబంధిత సమస్యల వల్ల రావొచ్చు.

ఛాతి నొప్పి - అత్యంత భయపెట్టే లక్షణం

ఛాతి నొప్పి సెర్చ్‌లలో అత్యంత సీరియస్ లక్షణంగా కనిపించింది. చాలాసార్లు ఇది గ్యాస్ లేదా అసిడిటీ కారణంగా వచ్చినా, కొన్నిసార్లు ఇది గుండెపోటు లేదా ఇతర ప్రమాదకర పరిస్థితుల సూచన కావచ్చు. అందుకే చాలామంది వెంటనే ఇంటర్నెట్‌ను ఆశ్రయించారు.

జుట్టు రాలడం, బరువులో మార్పులు, చర్మ సమస్యలు

ఈ ఏడాది జుట్టు రాలడం, అధిక బరువు పెరగడం/తగ్గడం, చర్మ దద్దుర్లు గురించి సెర్చ్‌లు కూడా ఎక్కువయ్యాయి. ఇవి సాధారణంగా స్ట్రెస్, పోషక లోపాలు లేదా హార్మోన్ సమస్యల వల్ల వస్తుంటాయి.

మానసిక ఆరోగ్యం - పెద్ద మొత్తంలో పెరిగిన సెర్చ్‌లు

ఆందోళన, ఒత్తిడి, నిద్రలేమి లాంటి మానసిక సమస్యలు ఈ ఏడాది మరోసారి సెర్చ్‌లను పెంచేశాయి. చాలా మంది తమకు ఎందుకు పానిక్ ఫీలింగ్ వస్తోందో తెలుసుకోవడానికి గూగుల్‌లో వివరాలు చూశారు.

మొత్తంగా, 2025లో భారత ప్రజలు గూగుల్‌లో ఎక్కువగా వెతికిన ఆరోగ్య లక్షణాలు వారి శారీరక, మానసిక ఆరోగ్యంపై ఉన్న ఆందోళనను స్పష్టంగా చూపిస్తున్నాయి. నిపుణులు మాత్రం ఒక హెచ్చరిక చేస్తున్నారు ఆన్‌లైన్ ద్వారా స్వీయ నిర్ధారణ చేయడం ప్రమాదం. లక్షణాలు కొనసాగితే, తప్పనిసరిగా వైద్యుడి సలహా తీసుకోవాలి.