మన ఆరోగ్యం మన వంటింట్లోనే ఉంది.. ఎలాగో తెలుసా?

వాతావరణ మార్పులతో ఆరోగ్యం కూడా దెబ్బతింటుంది. ముఖ్యంగా జలుబు, దగ్గు, సీజనల్ ఫ్లూ వంటి వ్యాధులు వేగంగా వ్యాప్తి చెందుతాయి. శీతాకాలంలో సమస్య అధికంగా ఉంటుంది. అందుకే రోగనిరోధక శక్తిని బలోపేతం చేసుకోవడం చాలా ముఖ్యం. కేవలం వంటగదిలో ఉన్న సుగంధ ద్రవ్యాలతో రోగనిరోధక శక్తిని పెంచుకోవచ్చు.

ఇంగ్లీషు మందులు వాడే బదులు సరైన ఆహారం తీసుకోవడం, వంటింటి మసాలాలు తీసుకోవడం ద్వారా వ్యాధి నిరోధక శక్తి బలపడుతుంది, సీజనల్ వ్యాధులను అరికట్టవచ్చని ఆయుర్వేద నిపుణులు అంటున్నారు.

అల్లం, మిరియాలు, తులసి వంటి వంటింటి మసాలా దినుసులతో తయారు చేసిన కషాయం జలుబు, దగ్గు వంటి వ్యాధులను నివారించేందుకు సహజసిద్ధమైన ఔషధమని చెబుతున్నారు.

చలికాలంలో సాధారణ టీకి బదులు అల్లంతో చేసిన డికాక్షన్ తీసుకోవడం చాలా మంచిది. రోజూ ఉదయం, సాయంత్రం తాగడం వల్ల రోగనిరోధక శక్తి పెరుగుతుంది.

ఈ కషాయాన్ని తయారు చేయడానికి అల్లం, మిరియాలు, తులసి ఆకులను కలిపి నీటిలో మరిగించాలి. దీనికి నల్ల ఉప్పును కలిపి తీసుకుంటే రుచితో పాటు ఆరోగ్యం పెరుగుతుంది.

అల్లంలో యాంటీ ఆక్సిడెంట్లు అధికంగా ఉంటాయి. మిరియాలు, తులసిలో కూడా యాంటీ ఆక్సిడెంట్లు ఎక్కువ సంఖ్యలో ఉండటం వల్ల మనల్ని వ్యాధుల నుంచి కాపాడుతాయి.