Bharat Men: భారతీయ పురుషులకు రొమాన్స్ అంటే ఏంటో తెలీదు..!

Bharat Men: భారతీయ పురుషులతో డేటింగ్ చేయను.. అంటూ ఓ లైఫ్ కోచ్ అన్న మాటలు ప్రస్తుతం నెట్టింట తీవ్ర విమర్శలు ఎదుర్కొంటున్నాయి. ఎవరో విదేశీ మహిళ ఈ మాటంటే మన నెటిజన్లు పట్టించుకోకపోదురు కానీ స్వయంగా ఓ భారతీయ మహిళ ఈ మాట అనడంతో ఈ విషయం పెద్ద సంచలనంగా మారింది. తమ జీవితాలను దారిలో పెట్టుకునేందుకు ఎందరికో సాయపడ్డ లైఫ్ కోచ్ చేతనా చక్రవర్తి ఈ కామెంట్లు చేయడం ఇప్పడు హాట్‌ టాపిక్‌ గా మారింది.

అయితే, తన నిర్ణయానికి గల కారణాలనూ ఆమె ఇలా చెప్పుకొచ్చింది. ‘‘భారతీయ పురుషులతో డేటింగ్ చేయడం మానేశా. ఇందుకు మూడు ముఖ్యమైన కారణాలు ఉన్నాయి. ఏ విషయంలోనైనా వారు తమ వాదనను సరిగా వినిపించలేకపోతే మూగనోము పడతారు. మహిళకు పొగరని, మొండిఘటమని అంటారు. వాళ్లకు రొమాన్స్ అంటే ఏంటో తెలీదు. అవతలి వారి కోసం రోజూ చేసే చిన్న చిన్న పనుల్లోనే రొమాన్స్ దాగుంది. భారీ బహుమతులు, హంగామాతో ఉపయోగాలు ఉండవు. భారతీయ పురుషులకు ఇంటిని శుభ్రంగా ఉంచుకోవడం తెలీదు. ఇంటి శుభ్రత భాగస్వామి కోసమే కాదని, అక్కడ తాము కూడా నివసిస్తున్నామనే స్పృహ ఉండదు’’ అని అంటూ ఆమె వివరించింది.

సహజంగానే ఈ వీడియోకు నెట్టింట భారీ స్పందన వచ్చింది. కొందరు మహిళలు మాత్రం ఆమెతో విభేదించారు. తాను భారతీయుడినే పెళ్లాడానని, అతనో అద్భుతమైన వ్యక్తి అంటూ ఓ మహిళ కామెంట్ పెట్టగా. కొందరితో చెడు అనుభవాలు ఎదురైనంత మాత్రాన భారతీయ పురుషులందరినీ ఒకేగాటన కట్టకూడదని మరి కొందరు కామెంట్లు చేస్తున్నారు. ఇది భారతీయ పురుషులకే ప్రత్యేకం కాదని, లింగవివక్షకు సంబంధించినదని మరికొందరు చెప్పుకొచ్చారు. కొందరు మాత్రం ఆమె అభిప్రాయంతో ఏకీభవించారు.

Also read: జనసేన పార్టీ ఐదుగురు ఎమ్మెల్యేలకు కీలక పదవులు