H-1B visa: హెచ్‌-1బీ దుర్వినియోగంపై ట్రంప్ ‘ఫైర్‌వాల్‌’.. వారిపై 175 కేసులు

Project Firewall : అమెరికా అధ్యక్షుడిగా ట్రంప్‌ ఎన్నికైన తర్వాత విదేశీ కార్మికులు, విద్యార్థుల మూలంగా హెచ్‌-1బీ వీసా దుర్వినియోగమవుతుందని ఆరోపించిన విషయం తెలిసిందే. హెచ్‌-1బీ వీసా (Visa) దుర్వినియోగం వల్ల అమెరికా ఉద్యోగాలన్నీ విదేశీ కార్మికులతో నిండిపోతున్నాయని అమెరికా ప్రభుత్వం ఆరోపిస్తోంది. ఈ క్రమంలో  కార్మిక శాఖ సెప్టెంబర్‌లో ప్రాజెక్ట్ ఫైర్‌వాల్‌ను ప్రారంభించింది. ప్రాజెక్ట్‌లో భాగంగా ఈ వీసా అవకతవకలపై కార్మిక శాఖ దర్యాప్తు ప్రారంభించింది. ఈ మేరకు వీసా దుర్వినియోగంపై 175 కేసులు నమోదు చేసినట్లు అమెరికా మీడియా సంస్థ ప్రచురించిన ఓ కథనంలో పేర్కొంది.

వీసా దుర్వినియోగాన్ని అరికట్టడానికి హెచ్‌-1బీ వీసా ఫీజును లక్ష డాలర్లకు పెంచుతూ అమెరికా అధ్యక్షుడు డొనాల్డ్‌ ట్రంప్‌ (Donald Trump) సంచలన నిర్ణయం తీసుకున్న విషయం తెలిసిందే. ఈ కార్యక్రమంలో భాగంగా కార్మికశాఖ ప్రాజెక్ట్ ఫైర్‌వాల్‌ను ప్రారంభించిన విషయం తెలిసిందే. అమెరికన్ యువతకు దక్కాలసిన ఉద్యోగాలను తక్కువ జీతాలకు పనిచేసే విదేశీ కార్మికులతో కంపెనీలు ఉద్యోగాలు భర్తీ చేయకుండా చూడటమే ఈ ప్రాజెక్ట్ ప్రధాన ఉద్దేశం. అలా ఎక్కడైన దుర్వినియోగం జరిగినట్లు తేలితే లేబర్ విభాగం ఆడిట్ నిర్వహిస్తుంది. అందులో భాగంగా ప్రతి అంశాన్ని పరిగణనలోకి తీసుకొని పరిశీలిస్తున్నామని ఆ శాఖ మంత్రి లోరి చావెజ్‌ తెలిపారు. అయితే ఈ దర్యాప్తునకు సంబంధించిన వివరాలను మాత్రం బయటపెట్టలేదు. అధ్యక్షుడి నాయకత్వంలో అధిక నైపుణ్యం కలిగిన ఉద్యోగాలు మొదట అమెరికా కార్మికులకే వెళ్లేలా చూస్తామని ఆయన పేర్కొన్నారు.

అందులో భాగంగానే ఇటీవల కార్మికశాఖ ఒక వీడియోను రూపొందించింది. ‘‘హెచ్‌-1బీ వీసా (Visa) దుర్వినియోగం కారణంగా విదేశీ కార్మికులతో ఉద్యోగాలు నిండిపోతున్నాయి. యువ అమెరికన్ల అమెరికా డ్రీమ్ చోరీకి గురవుతోంది. అమెరికా అధ్యక్షుడు ట్రంప్, లేబర్ విభాగం నాయకత్వంలో వీసాను దుర్వినియోగం చేస్తున్న కంపెనీలపై చర్యలు తీసుకుంటాం. ఈ విషయంలో వారినే జవాబుదారీ చేస్తున్నాం’’ అని ఆయన ప్రస్తావించింది. హెచ్‌-1బీల్లో 72 శాతం భారతీయులకే వెళ్తున్నాయని వీడియోలో భాగంగా ఓ గ్రాఫ్‌లో చూపించిన విషయం తెలిసిందే.