టీటీడీ మాదిరిగా దుర్గు గుడికి ఎస్టీఎంబీసీ ఛానల్... పాలక మండలి సమావేశంలో కీలక నిర్ణయాలు...!

దుర్గగుడి పాలకమండలి సమావేశాన్ని ఈ రోజు నిర్వహించారు. సమావేశంలో పలు కీలక తీర్మానాలకు పాలక మండలి ఆమోదం తెలిపింది. శివాలయాన్ని త్వరితగతిన భక్తులకు అందుబాటులోకి తీసుకు రావాలని నిర్ణయించినట్టు దుర్గ గుడి పాలక మండలి చైర్మన్ కర్నాటి రాంబాబు వెల్లడించారు. శివాలయంలో రూ.40 లక్షల అంచనాతో నవగ్రహ మండపం ఏర్పాటు చేస్తామన్నారు.

వృద్ధులు, వికలాంగులకు బ్యాటరీ వాహనాలతో పాటు రెండు డీజిల్ వాహనాలు ఏర్పాటు చేస్తామన్నారు. పసిపిల్లలతో వచ్చే తల్లులకు ప్రత్యేక క్యూలైన్ ద్వారా దర్శనం కల్పించాలని నిర్ణయించామన్నారు. దూర ప్రాంత భక్తుల కోసం మహామండపం మొదటి అంతస్తులో డార్మిటరీ ఏర్పాటు చేయనున్నట్టు చెప్పారు. నామమాత్రపు రుసుముతో డార్మిటరీలో బసకు ఏర్పాట్లు చేస్తామన్నారు.

ఫ్లై ఓవర్ మీద వెళ్లే భక్తులకు కనిపించేలా అమ్మవారి చిత్రాలు ఏర్పాటుకు పాలక మండలి ఆమోదం తెలిపిందన్నారు. బంగారు ఆభరణాల దాతలకు అందుబాటులో వుండేలా గోల్డ్ అప్రైజర్ ను నియమించాలని నిర్ణయించామన్నారు. అమ్మవారి ఆలయంలో వివాహం చేసుకున్న నూతన జంటకు మ్యారేజ్ టిక్కెట్ ఇవ్వాలని నిర్ణయించామన్నారు. అమ్మవారి స్థల పురాణం పై డాక్యుమెంటరీ రూపొందించే ప్రతిపాదనకు పాలక మండలి ఆమోద ముద్ర వేసిందన్నారు.

దుర్గా ఘాట్ ను త్వరలోనే అందుబాటులోకి తెస్తామన్నారు. అమ్మవారి సేవలను సోషల్ మీడియా, యూట్యూబ్ లో లైవ్ టెలికాస్ట్ ద్వారా విస్తృత ప్రచారం కల్పిస్తామన్నారు. అమ్మవారి సేవలకు ప్రచారం కల్పించేందుకు ఏపీ ఫైబర్ నెట్ కూడా అంగీకారం తెలిపిందన్నారు. టీటీడీ ఎస్వీబీసీ మాదిరిగా దుర్గగుడికి ఎస్డీఎంబీసీ ఛానల్ అందుబాటులోకి తెస్తామన్నారు.

అమ్మవారి కుంకుమ ప్రసాదం ప్రతీ భక్తుడికి ఇచ్చే కార్యక్రమాన్ని పౌర్ణమి రోజన ప్రారంభిస్తామన్నారు. రెండు వేల మంది ఒకేసారి అన్న ప్రసాదం స్వీకరించేలా అన్నదాన భవన్ ను విస్తరిస్తున్నామని వివరించారు. రాబోయే నెల రోజుల్లో అన్నదాన భవన్‌కు శంకుస్థాపన చేస్తామన్నారు.