Union Budget 2024: బడ్జెట్ కు ముందు ద్రవ్యోల్బణంపై ప్రభుత్వ యుద్ధం.. ఏం చేస్తోందంటే.. 

Inflation Control: దేశ బడ్జెట్‌కు (Union Budget 2024) ఇంకా రెండు వారాల సమయం ఉంది.  అయితే దేశంలో కనిపిస్తున్న ద్రవ్యోల్బణ గణాంకాలతో ప్రభుత్వం చాలా ఆందోళన చెందుతోంది.  ఇప్పుడు ద్రవ్యోల్బణాన్ని నియంత్రించేందుకు ప్రభుత్వం ప్రణాళిక రూపొందించింది. వాస్తవానికి, ఫుడ్ కార్పొరేషన్ ఆఫ్ ఇండియా అంటే ఎఫ్‌సిఐ జనవరిలో మూడు ప్రభుత్వ ఏజెన్సీలకు 3,00,000 టన్నుల గోధుమలను కేటాయించబోతోంది. ఇది ద్రవ్యోల్బణాన్ని నియంత్రించడంలో సహాయపడుతుంది. ఈ గోధుమలను పిండిగా మార్చి, భారత్ అట్టా బ్రాండ్ కింద వినియోగదారులకు తగ్గింపు ధరకు  విక్రయించనున్నారు. ప్రస్తుతం, రిటైల్ స్థాయిలో ప్రభుత్వం జోక్యం చేసుకున్నప్పటికీ  పిండి (గోధుమ పిండి) ధరలు కొద్దిగా పెరిగాయి. 

4 నెలల గరిష్టానికి ద్రవ్యోల్బణం
మినిస్ట్రీ ఆఫ్ కన్స్యూమర్ అఫైర్స్ డేటా ప్రకారం, గోధుమ పిండి అఖిల భారత సగటు రిటైల్ ధర కిలోకు రూ.36.50కి పెరిగింది. ఆహార ధరల పెరుగుదల కారణంగా డిసెంబరులో భారతదేశ రిటైల్ ద్రవ్యోల్బణం నాలుగు నెలల గరిష్ట స్థాయి 5.69 శాతానికి పెరిగింది. సగటు ధర కంటే ఎక్కువగా ఉన్న ప్రాంతాల్లో ధరలు తగ్గించాలని ప్రభుత్వం లక్ష్యంగా పెట్టుకుందని కేంద్ర ఆహార కార్యదర్శి సంజీవ్ చోప్రా తెలిపారు. ఇది కాకుండా, ఆహార ద్రవ్యోల్బణాన్ని అధిగమించడానికి ప్రభుత్వం మార్చి వరకు పిండి విక్రయాలను కొనసాగిస్తుంది. అయితే, ఇది ధరలు..  అవసరాలపై ఆధారపడి ఉంటుంది.

3 లక్షల టన్నుల గోధుమలు కేటాయిస్తారు
నాఫెడ్ (నేషనల్ అగ్రికల్చరల్ కోఆపరేటివ్ మార్కెటింగ్ ఫెడరేషన్ ఆఫ్ ఇండియా లిమిటెడ్), ఎన్‌సిసిఎఫ్ (నేషనల్ కోఆపరేటివ్ కన్స్యూమర్స్ ఫెడరేషన్ ఆఫ్ ఇండియా లిమిటెడ్), మూడు ఏజెన్సీ ల ద్వారా డిసెంబర్‌లో సుమారు 1,00,000 టన్నుల గోధుమలను పిండి రూపంలో సేకరించినట్లు సంజీవ్ చోప్రా మీడియా నివేదికలో తెలిపారు. జనవరిలో ఈ మూడు ఏజెన్సీల ద్వారా వినియోగదారులకు సుమారు 3,00,000 టన్నుల గోధుమలను పిండి రూపంలో ఆఫ్‌లోడ్ చేయడానికి సన్నాహాలు చేస్తున్నారు. మొత్తంమీద, డిసెంబర్ - జనవరిలో భారతదేశ వినియోగదారులకు పిండి రూపంలో సుమారు 4,00,000 టన్నుల గోధుమలు ఇవ్వడం జరుగుతుందని భావిస్తున్నట్లు అయన చెప్పారు. 

Also Read: అక్కడికి రాముడొక్కడే కాదు.. వేలాది కోట్ల పెట్టుబడులు కూడా 

మార్చి వరకు తక్కువ ధరకే పిండి..
Inflation Control: ధరలు ఇంకా ఎక్కువగానే ఉంటే, అవసరాన్ని బట్టి ప్రభుత్వం ఈ పథకాన్ని జనవరి తర్వాత ఫిబ్రవరి-మార్చి వరకు కొనసాగిస్తుంది. FCI ద్వారా ఆహార - ప్రజా పంపిణీ శాఖ ఇప్పటివరకు NAFED, NCCF, కేంద్రీయ భండార్‌లకు 3,90,000 టన్నుల గోధుమలను కేటాయించింది.  ఈ ఏజెన్సీలు మిల్లింగ్ - ప్రాసెసింగ్ తర్వాత వినియోగదారులకు 1,16,617 టన్నుల పిండిని విక్రయించాయి. ప్రస్తుతం, FCI దాని బఫర్ స్టాక్‌లో 15.9 మిలియన్ టన్నుల గోధుమలను కలిగి ఉంది, ఇది జనవరి 1 నాటికి బఫర్ ప్రమాణం 13.8 మిలియన్ టన్నుల కంటే ఎక్కువ.

దీపావళికి ముందే భారత్ బ్రాండ్ పిండి వచ్చింది
దీపావళికి ముందు, కేంద్ర ప్రభుత్వం దేశవ్యాప్తంగా 'భారత్' బ్రాండ్‌తో కిలోకు రూ. 27.50 సబ్సిడీపై పిండి విక్రయాన్ని అధికారికంగా ప్రారంభించింది. ఆహార ద్రవ్యోల్బణాన్ని(Inflation Control) నియంత్రించడమే దీని లక్ష్యం. ఈ పథకం కింద, సహకార సంఘాలైన నాఫెడ్, ఎన్‌సిసిఎఫ్, కేంద్రీయ భండార్‌లకు ఎఫ్‌సిఐ నుంచి కిలోకు రూ. 21.50 చొప్పున 2,30,000 టన్నుల గోధుమలు కేటాయించారు. ఈ మూడు ఏజెన్సీలు గోధుమలను పిండిగా మార్చి 800 మొబైల్ వ్యాన్లు, 2,000 రిటైల్ పాయింట్లు, దుకాణాల ద్వారా భారత్ అట్టా బ్రాండ్ క్రింద వినియోగదారులకు విక్రయిస్తాయి.

Watch this interesting Video: