సెల్​ఫోన్​తో గ్రూప్​-4 పరీక్ష హాల్​లోకి

మాల్‌ ప్రాక్టీస్‌ కింద బుకైయ్యాడు

తెలంగాణ వ్యాప్తంగా గ్రూప్​- 4 పరీక్ష సజావుగా సాగుతుంది అనుకున్న సమయంలోనే జరగాల్సిన ఘోరం జరుగనే జరిగింది. అత్యధిక పోస్టులకు టీఎస్​పీఎస్సీ నోటిఫికేషన్​ విడుదల చేయడంతో ఈ సారి భారీ స్థాయిలో అభ్యర్థులు పోటీ పడుతున్నారు. మరోవైపు గత అనుభవాలను దృష్టిలో పెట్టుకొని కమిషన్​ కఠిన నియమాలు అమలు చేసింది. పరీక్ష ప్రారంభమయ్యే సమయానికి 15నిమిషాలు ముందే గేట్లు మూసివేశారు. ఎంత కఠినంగా నియమాలు అమలు చేసినా.. ఓచోట మాల్​ ప్రాక్టీస్ జరిగింది. ఓ అభ్యర్థి ఏకంగా పరీక్షా హాల్​లోకి సెల్​ఫోన్ తీసుకుని వెళ్లాడు. పరీక్ష రాస్తుండగా గమనించిన ఇన్విజిలేటర్ అతడిని పట్టుకుని మాల్‌ ప్రాక్టీస్‌ కింద కేసు బుక్​ చేశారు.

సెల్​ఫోన్​తో పరీక్షా కేంద్రంలోకి

తెలంగాణ రాష్ట్ర పబ్లిక్ సర్వీస్ కమిషన్ నిర్వహించిన గ్రూప్-4 పరీక్షలో ఓ అభ్యర్థి సెల్​ఫోన్​తో పట్టుబడ్డాడు. రంగారెడ్డి జిల్లా సరూర్​నగర్ మండలం మారుతినగర్​లోని ఓ కళాశాలలో ఏర్పాటు చేసిన పరీక్షా కేంద్రంలో ఓ అభ్యర్థి సెల్​ఫోన్​తో పరీక్షా కేంద్రానికి వెళ్లాడు. పరీక్ష ప్రారంభమైన అరగంట తర్వాత గమనించిన ఇన్విజిలేటర్ ఉన్నత అధికారులకు సమాచారం ఇచ్చారు. అక్కడికి చేరుకున్న అధికారులు.. అతని సెల్​ఫోన్ సీజ్ చేసి మాల్ ప్రాక్టీస్ కింద కేసు నమోదు చేశారు. సదరు అభ్యర్థిని సమగ్ర విచారణ నిమిత్తం పోలీసులకు అప్పగించడం జరిగిందని జిల్లా కలెక్టర్​ హరీశ్​ తెలిపారు.

ఒరిజినల్ ఆధార్‌కార్డు లేదని పరీక్ష రద్దు

ఈ ఘటన మినహా జిల్లా వ్యాప్తంగా ఉదయం సెషన్​లో జరిగిన గ్రూప్-4 పేపర్-1 పరీక్ష ప్రశాంతంగా జరిగిందని తెలిపారు. మరోవైపు కొందరు అభ్యర్థులు వివిధ కారణాలతో పరీక్ష కేంద్రానికి ఆలస్యంగా రాగా.. వారిని నిర్వహకులు అనుమతించలేదు. దీంతో నిరాశతో వెనుతిరగాల్సి వచ్చింది. నిజామాబాద్ జిల్లాలో ఒరిజినల్ గుర్తింపు కార్డు తీసుకురాని 10 మంది అభ్యర్థులను అధికారులు పరీక్షకు అనుమతించ లేదు. నల్గొండ జిల్లాలో పరీక్ష రాస్తున్న ఐదుగురు గ్రూప్‌ 4 అభ్యర్థులను ఒరిజినల్ ఆధార్‌కార్డు లేదని అధికారులు బయటకు పంపారు. ఆధార్‌ కార్డు ఒరిజినల్ కాకుండా.. జిరాక్స్‌ తేవడంతో పరీక్ష మధ్యలోనే అభ్యర్థులను వెనక్కి పంపించారు.