SIIMA AWARDS 2025: తగ్గేదేలే.. 11 నామినేషన్లతో పుష్పరాజ్ అవార్డుల వేట!

SIIMA 2025:2025 సౌత్ ఇండియన్ ఇంటర్నేషనల్ మూవీ అవార్డ్స్ (SIIMA AWARDS) సందడి మొదలైంది. సెప్టెంబర్ 5, 6 తేదీల్లో దుబాయ్ వేదికగా సైమా ఉత్సవం అట్టహాసంగా జరగనుంది. ఈ మేరకుతాజాగా నామినేషన్ల జాబితా విడుదలైంది. 2024లో దక్షిణాదిలో విడుదలైన అద్భుతమైన చిత్రాలు, అద్భుతమైన ప్రదర్శనలకు గాను ఈ అవార్డులను అందించనున్నారు. 2024లో ఉత్తమ ప్రతిభ కనబరిచిన దక్షిణాది చిత్రాలు, నటీనటులు, సాంకేతిక నిపుణులకు ఈ అవార్డులను అందజేయనున్నారు.  ఈ ఏడాది నామినేషన్లలో కొన్ని సినిమాలు సత్తా చాటగా, స్టార్ హీరోలు, హీరోయిన్లు, దర్శకులు, సాంకేతిక నిపుణులు పలు విభాగాల్లో నామినేట్ అయ్యారు.

తెలుగులో 'పుష్ప 2' హవా!

• తెలుగు సినిమా పరిశ్రమ నుంచి అల్లు అర్జున్  'పుష్ప2' అత్యధిక నామినేషన్లతో టాప్ లో నిలిచింది.  ఏకంగా 11 విభాగాల్లో ఈ చిత్రం నామినేటై అవార్డుల రేసులో ముందంజలో ఉంది. ఇది భారీ విజయాన్ని మరోసారి నిరూపించింది.
• కల్కి2898 ఏడీ, హనుమాన్ చిత్రాలు చెరో 10 కేటగిరీల్లో నామినేషన్ దక్కించుకొని రెండవ స్థానంలో ఉన్నాయి. 

రసవత్తర పోటీ!

తెలుగుతో పాటు, తమిళం, మలయాళం, కన్నడ చిత్రాలు కూడా ఏమాత్రం తగ్గడం లేదు. పలు సినిమాలు 5 పైగా నామినేషన్లతో దూసుకుపోతున్నాయి. 

•  కోలీవుడ్ నుంచి  శివ కార్తికేయన్ - సాయిపల్లవి జంటగా నటించిన  'అమరన్' ఏకంగా 13 నామినేషన్లతో అందరి దృష్టిని ఆకర్షించింది. 
•  'లబ్బర్ పందు' 8 విభాగాల్లో నామినేషన్లు 
•  'వాజై' 7 విభాగాల్లో నామినేట్ అయ్యాయి.

•  కన్నడ చిత్ర పరిశ్రమ నుంచి 'భీమా', 'కృష్ణ ప్రణయ సఖి' చిత్రాలు చెరో 9 విభాగాల్లో నామినేషన్లు పొందాయి. 

• 'ఇబ్బని తబ్బిడ ఇలియాలి' 7 విభాగాల్లో నామినేట్ అయ్యింది. .

• మలయాళం చిత్రాలకు సంబంధించిన వివరాలు త్వరలోనే వెల్లడి కానున్నాయి.

ఇక ఈ నామినేట్ అయిన చిత్రాలు, నటీనటుల్లో అవార్డులు ఎవరికి దక్కాలి అనేది నిపుణులతో కూడిన  జ్యురీ నిర్ణయిస్తుంది. అలాగే ప్రజా ఓటింగ్ కూడా పరిగణలోకి తీసుకుంటారు.