'కోహినూర్' డైమండ్ కోసం సిద్దూ జొన్నలగడ్డ పోరాటం.. న్యూ మూవీ అనౌన్స్మెంట్

విజయదశమిని పురస్కరించుకొని నేడు టాలీవుడ్ నుంచి కొత్త సినిమా అనౌన్స్ మెంట్లు వరుసగా వస్తున్నాయి. తాజాగా స్టార్ బాయ్ సిద్దూ జొన్నలగడ్డ సైతం పండగ రోజు తన కొత్త సినిమాను అనౌన్స్ చేశాడు. ఈ మూవీకి 'కోహినూర్‌' అనే టైటిల్‌ను ఫిక్స్‌ చేశారు. రెండు భాగాలుగా ఈ ప్రాజెక్ట్‌ ఉంటుందని తెలిపారు.

విజయదశమి శుభ సందర్భంగా, భారతీయ సినిమా చరిత్రలో ఇంతవరకు ఎవరూ ఊహించని కథాంశంతో సినిమా చేస్తున్నట్లు చిత్ర నిర్మాతలు ప్రకటించారు. "కోహినూర్ వజ్రాన్ని తిరిగి తీసుకురావడం" అనే సంచలన కథాంశంతో ఈ మూవీ రూపొందనుంది. ఈ సందర్భంగా రిలీజ్ చేసిన ఈ పోస్టర్ లో చుట్టూ రాజుల కాలం లాంటి శిలా తోరణం ఉండగా మధ్యలో సిద్ధూ కత్తి పట్టుకొని కోహినూర్ వజ్రం పట్టుకొని ఉన్నాడు.

ఊహించని కథతో..

దీంతో ఈ పోస్టర్ తోనే సినిమాపై ఆసక్తి నెలకొంది. కోహినూర్ వజ్రాన్ని తిరిగి  తీసుకురావడానికి యువకుడు సాగించే చారిత్రాత్మక ప్రయాణంగా ఈ చిత్రం రూపొందనుంది. సిద్దూ జొన్నలగడ్డతో  'కృష్ణ అండ్ హిజ్ లీల' అనే రొమాంటిక్ ఎంటర్‌టైనర్‌ను తెరకెక్కించిన రవికాంత్ పేరెపు ఈ సినిమాకు దర్శకత్వం వహిస్తున్నారు. 

ఈ సినిమాని 2026 జనవరిలో రిలీజ్ చేస్తామని మూవీ యూనిట్ తెలిపారు. సితార ఎంటర్‌టైన్‌మెంట్స్‌ ఈ ప్రాజెక్ట్ ను నిర్మిస్తోంది. ఈ నిర్మాణ సంస్థ సిద్దూతో నిర్మించిన డీజే టిల్లు, టిల్లు స్క్వేర్ రెండు చిత్రాలు బ్లాక్‌బస్టర్‌ అందుకున్నాయి. 'కోహినూర్' వీరి కాంబోలో రూపొందనున్న హ్యాట్రిక్ ఫిలిం కావడం విశేషం.