Radhika Apte: దీపికా దారిలోనే రాధికా.. షూటింగ్‌ కు రావాలంటే కండిషన్స్ అప్లై..!

Radhika Apte: నటి రాధికా ఆప్టే తాజాగా షూటింగ్ గంటల విషయంలో తీసుకున్న నిర్ణయం సినిమా పరిశ్రమలో చర్చకు కారణమైంది. గతంలో దీపికా పడుకోణె “8 గంటల షిఫ్ట్” గురించి మాట్లాడిన అంశాలు హాట్ టాపిక్‌గా మారాయి. రాధికా కూడా తన వ్యక్తిగత, వృత్తిపరమైన అవసరాలను కాపాడుకునే విధంగా స్పష్టమైన నియమాలు పెట్టారు.

ఇంటర్వ్యూలో రాధికా మాట్లాడుతూ, “వారం రోజుల పాటు నా బిడ్డను చూడకుండా ఉండడం నాకు సాధ్యం కాదు. అందుకే షూటింగ్ గంటలను మార్చుకోవడం చాలా అవసరం. ఈ నిర్ణయం తీసుకునే క్రమంలో చాలాసార్లు వాదనలు, గొడవలు ఎదుర్కొన్నా, ఒక నటిగా హక్కుల కోసం పోరాడడం ఎంత ముఖ్యం అనేది తెలుసుకున్నాను. చాలామంది సెట్‌కు తల్లి-తండ్రులను తీసుకురావాలని సలహా ఇస్తున్నారు, కానీ అది సరైన పరిష్కారం కాదు. మాతృత్వానికి ప్రాధాన్యత ఇవ్వడం నాకు ముఖ్యం.”

రాధికా తన వర్క్ షెడ్యూల్‌ను కూడా స్పష్టంగా పేర్కొన్నారు. ఆమె చెప్పిన నియమాల ప్రకారం, రోజుకు గరిష్టంగా 12 గంటల షిఫ్ట్ మాత్రమే ఉండాలి. ఈ 12 గంటల్లో ప్రయాణం, మేకప్, హెయిర్, షూటింగ్ సమయం అన్నీ కలిపి ఉండాలి. ఉదాహరణకు, ప్రయాణానికి రెండు గంటలు పడితే, ఆ సమయాన్ని కూడా పని గంటలలోకి తీసుకోవాలి. వారంలో ఐదు రోజులే ఆమె పనిచేయాలని కోరుకుంటున్నారు, వారపు సెలవులు తప్పక ఉండాలి. చిన్న సినిమాలు మాత్రమే కొంతమేర వర్క్ షెడ్యూల్‌లో మినహాయింపులు ఉండవచ్చు.

చాల మంది నా నిర్ణయాన్ని అంగీకరించరు. కొంతమంది మాత్రమే మద్దతు ఇస్తారు, కానీ నా ప్రాధాన్యతలు, బిడ్డతో గడపాల్సిన సమయం, వృత్తిపరమైన బాధ్యతలు అన్నీ సమతుల్యం ఉండాలి” అని గట్టి మనోభావంతో తెలిపారు.

రాధికా ఆప్టే తన ప్రతిభ, నిజాయితీ కారణంగా ఇండస్ట్రీలో ప్రసిద్ధి చెందారు. ఇటీవల ఆమె “రాత్ అకేలీ హై: ది బన్సాల్ మర్డర్స్”, “సాలి మోహబత్” వంటి ప్రాజెక్ట్స్‌లో కనిపించారు. త్వరలో ఆమె కీర్తి సురేష్ తో కలిసి “అక్క” అనే వెబ్ సిరీస్‌లో నటించనున్నారు.