బాబు, పవన్ ప్రమాణ స్వీకారానికి చిరంజీవి!

ఇటీవల జరిగిన ఏపీ ఎన్నికల్లో జనసేన, తెలుగుదేశం, బీజేపీ కూటమి భారీ విజయం సాధించిన విషయం తెలిసిందే. దీంతో రేపు చంద్రబాబు నాయుడు రేపు ఉదయం 11.27 గంటలకు ప్రమాణస్వీకారం చేయనున్నారు. ఇందుకోసం గన్నవరం ఎయిర్ పోర్టు దగ్గరలో ఉన్న కేసరపల్లి ఐటీ పార్కులో సుమారు 11 ఎకరాల స్థలంలో భారీ ఏర్పాట్లు చేస్తున్నారు. ఇప్పటికే సీఎంగా చంద్రబాబు ప్రమాణ స్వీకారానికి సర్వం సిద్ధం అయింది. ప్రమాణ స్వీకారోత్సవానికి ముఖ్య అతిథిగా ప్రధాని మోదీతోపాటు కేంద్రహోం మంత్రి అమిత్‌షా సైతం హాజరుకానున్నారు.

వీళ్ళతో పాటుగా సినీ రాజకీయ పారిశ్రామిక రంగాలకు చెందిన ప్రముఖులు పెద్ద ఎత్తున ఈ కార్యక్రమానికి హాజరవనున్నారు.ఇందులో భాగంగానే చంద్రబాబు ప్రమాణస్వీకారానికి ప్రముఖ సినీ హీరో మెగాస్టార్ చిరంజీవికి ఆహ్వానం అందింది. స్టేట్ గెస్ట్గా చిరంజీవికి స్వయంగా చంద్రబాబు ఈ ఆహ్వానం పంపారు. అయన ఆహ్వానం మేరకు చిరంజీవి ఈరోజు సాయంత్రం ఐదు గంటలకు విజయవాడకు చేరుకోనున్నారు. చిరంజీవితోపాటు రాంచరణ్ కి కూడా ఆహ్వానం అందడంతో ఆయన కూడా విజయవాడ వెళ్లనున్నారు.

మరోవైపు పవన్ కళ్యాణ్ కూడా ఇదే వేదికపై మంత్రిగా ప్రమాణ స్వీకారం చేసే అవకాశాలు ఉన్నట్లు చెబుతున్నారు. ప్రస్తుతం తన తమ్ముడి గెలుపుని ఎంతగానో ఎంజాయ్ చేస్తున్న చిరు.. మంత్రిగా తమ్ముడి ప్రమాణ స్వీకారం కోసం ఆసక్తిగా ఎదురుచూస్తున్నాడు. ఇలాంటి తరుణంలో మెగాస్టార్ కి  చంద్రబాబు ప్రమాణస్వీకారానికి ఆహ్వానం అందడంతో మెగా అభిమానులంతా ఈ వేడుక కోసం వేయి కళ్ళతో ఎదురుచూస్తున్నారు.