ప్రస్తుతం చిరంజీవి ఆలోచన పూర్తి భిన్నంగా సాగుతోంది. ప్రేక్షకులను ఉత్తేజపరిచే, రొటీన్ యాక్షన్-కమర్షియల్ ఎంటర్టైనర్ కాకుండా.. ఒక విభిన్నమైన చిత్రంతో ముందుకు వెళ్లాలనుకుంటున్నారు. బింబిసార దర్శకుడు మల్లిడి వశిస్ట్‌తో ఆయన చేయబోయే సినిమా అలాంటిదే.

చాలా కాలం తర్వాత మెగాస్టార్ చేస్తున్న ఫాంటసీ సినిమా ఇది. అప్పుడెప్పుడో జగదేకవీరుడు అతిలోకసుందరి చేశారు. ఆ తర్వాత అంజి లాంటి ప్రయోగం చేశారు. మళ్లీ ఇన్నేళ్లకు వశిష్ఠ దర్శకత్వంలో పంచభూతాల కాన్సెప్ట్ తో ఓ ఫాంటసీ సినిమాకు ఓకే చెప్పారు. ఈ కొత్తదనానికి, తన స్టార్ ఇమేజ్ సరిగ్గా సరిపోతుందని, బాక్సాఫీస్ వద్ద మంచి ఫలితం ఇస్తుందని చిరంజీవి భావిస్తున్నారు.

అంతేకాదు.. కూతురి సినిమాను ఆపేసిన చిరంజీవి, ఆ స్థానంలో త్రివిక్రమ్ తో కలిసి పనిచేయాలనుకుంటున్నారు. ఇదే విషయాన్ని త్రివిక్రమ్‌కి తెలియజేశారు మెగాస్టార్. దీనికి త్రివిక్రమ్ కూడా ఓకే చెప్పాడు. నిజానికి వీళ్లిద్దరి కాంబినేషన్ లో సినిమా ఎప్పట్నుంచో ఉంది. త్రివిక్రమ్ దర్శకత్వంలో తను సినిమా చేస్తానని, ఓ ఫంక్షన్ లో సభాముఖంగా చెప్పారు చిరంజీవి. అది ఇన్నాళ్లకు కార్యరూపం దాలుస్తున్నట్టుంది.

గుంటూరు కారం తర్వాత త్రివిక్రమ్ అల్లు అర్జున్‌తో కలిసి పనిచేయాల్సి ఉంది. కానీ అల్లు అర్జున్ పుష్ప 2 తర్వాత అట్లీతో వెళ్లాలని అనుకుంటున్నాడట. అదే కనుక జరిగితే, చిరంజీవితో కలిసి త్రివిక్రమ్ సెట్స్ పైకి రావడం చిటికెలో పని. ఈ ఈక్వేషన్స్ అన్నీ పక్కనపెడితే, నిజంగా త్రివిక్రమ్ తో చిరంజీవి సినిమా చేయాలనుకుంటే, అందరూ మెగాస్టార్ కు దారివ్వాల్సిందే. ఈ విషయంలో చిరంజీవికి ఎలాంటి అడ్డంకులు ఉండవు. ఆయన స్థాయి అది.