Pravalika Issue: ప్రవళిక గ్రూప్-1, 2, 3, 4 కు అప్లై చేసింది.. ఇదిగో ప్రూఫ్స్

Pravalika News: ఇటీవల నిరుద్యోగి ప్రవళిక ఆత్మహత్య వ్యవహారం (Pravalika Issue) తెలంగాణలో తీవ్ర సంచలనం సృష్టించిన విషయం తెలిసిందే. వరుసగా ప్రభుత్వ నియామక పరీక్షలు వాయిదా పడడంతోనే ప్రవళిక ఆత్మహత్య చేసుకుందంటూ నిరుద్యోగులు భారీగా ఆందోళనలు చేపట్టారు. దీంతో తీవ్ర ఉద్రిక్త పరిస్థితులు ఏర్పడ్డాయి. ప్రతిపక్షాల నేతలు కూడా ప్రవళిక ఆత్మహత్య వ్యవహారంపై తీవ్రంగా స్పందించారు. ఉద్యోగాల భర్తీపై ప్రభుత్వం వ్యవహరించిన తీరు కారణంగానే ప్రవళిక ఆత్మహత్య చేసుకుందని తీవ్ర స్థాయిలో ఆరోపణలు చేశారు. అయితే.. పోలీలు మాత్రం ప్రేమ విఫలం కారణంగానే ప్రవళిక ఆత్మహత్య చేసుకుందని తేల్చడం కూడా సంచలనం సృష్టించింది. ఆమె ప్రియుడికి వేరే వ్యక్తితో నిశ్చితార్థం జరగడంతోనే ప్రవళిక ఆత్మహత్య చేసుకుందని హైదరాబాద్ సెంట్రల్ జోన్ డీసీపీ వెంకటేశ్వర్ రావు ప్రెస్ మీట్ పెట్టి చెప్పడం అందరినీ షాక్ కు గురి చేసింది.
ఇది కూడా చదవండి: Pravalika Suicide: ప్రవళిక ఆత్మహత్య కేసులో బిగ్ ట్విస్ట్.. సంచలన విషయాలు వెల్లడించిన పోలీసులు

ఇప్పటివరకు ప్రవళిక గ్రూప్స్ పరీక్షలే రాయలేదని ఆయన చెప్పారు. 15 రోజుల క్రితమే ప్రవళిక హైదరాబాద్ వచ్చిందని తేల్చేశారు. ప్రవళిక ఆత్మహత్య తర్వాత ఆందోళన చేసిన వారిని, రెచ్చగొట్టిన వారందరిపైనా కేసులు పెడతామని స్పష్టం చేశారు. ప్రభుత్వ ఒత్తిడితోనే పోలీసులు ఇలా చెప్పారని.. ఇది దుర్మార్గమని ఆ సమయంలో వివిధ పక్షాల నేతలు దుమ్మెత్తిపోశారు. టీపీసీసీ చీఫ్‌ రేవంత్ రెడ్డి ప్రవళిక కుటుంబ సభ్యులకు ఫోన్ చేసి పరామర్శించారు.

రాహుల్ గాంధీ (Rahul Gandhi) స్వయంగా వచ్చి ప్రవళికను పరామర్శిస్తారని చెప్పారు. ఇదిలా ఉంటే తాజాగా ఓ టీవీ చానల్ కు ఇచ్చిన ఇంటర్వ్యూలో మంత్రి కేటీఆర్ (KTR) మాట్లాడుతూ.. ప్రవళిక ప్రేమ వ్యవహారం కారణంగానే ఆత్మహత్య చేసుకుందని చెప్పారు. ఈ నేపథ్యంలో నెటిజన్లు ప్రవళిక గ్రూప్-1, 2, 3, 4 కు అప్లై చేసిందని.. ఇందుకు సంబంధించిన టీఎస్పీఎస్సీ (TSPSC) పత్రాలను సోషల్ మీడియాలో షేర్ చేస్తున్నారు. కేటీఆర్ ను ట్యాగ్ చేసి ఇప్పుడు సమాధానం చెప్పాలంటూ డిమాండ్ చేస్తున్నారు. దీంతో ఈ అంశంపై అధికారులు, టీఆర్ఎస్ వర్గాలు ఎలా స్పందిస్తారన్న అంశంపై చర్చ సాగుతోంది.