YCP డిజిటల్ బుక్ యాప్‌ ఎలా పనిచేస్తుందంటే.. జగన్ ప్లాన్ ఇదే!

కూటమి ప్రభుత్వం అధికారంలోకి వచ్చాక తమ కార్యకర్తలను, నాయకులను అక్రమ కేసులు పెట్టి ఇబ్బందులకు గురిచేస్తుందంటూ వైసీపీ చీఫ్, ఏపీ మాజీ సీఎం వైఎస్ జగన్ పలుమార్లు ఆరోపించిన సంగతి తెలిసిందే. బాధితులను కూడా జగన్ నేరుగా వెళ్లి పరామర్శించారు. ఈ క్రమంలో జగన్ కీలక నిర్ణయం తీసుకున్నారు. కార్యకర్తల ఫిర్యాదు కోసం వైసీపీ డిజిటల్ బుక్ యాప్, వెబ్ సైట్  ను బుధవారం గ్రాండ్ గా లాంచ్ చేశారు. తాడేపల్లిలో జరిగిన వైసీపీ విస్తృతస్థాయి సమావేశంలో జగన్ ఈ యాప్‌ను ఆవిష్కరించారు. 

అనంతరం జగన్ మాట్లాడుతూ.. అన్యాయానికి గురవుతున్న కార్యకర్తల కోసం దీన్ని తీసుకొచ్చామని చెప్పారు. రాష్ట్రంలో వైసీపీ అధికారంలోకి వచ్చాక ఈ ఫిర్యాదులన్నింటిపై కచ్చితంగా విచారణ జరిపిస్తామని జగన్ హామీ ఇచ్చారు. అన్యాయం చేసిన వారు ఎక్కడున్నా సరే.. తీసుకొచ్చి చట్టం ముందు నిలబెడతాన్నారు జగన్. ఈరోజు కూటమి సర్కార్ రెడ్‌బుక్‌ అంటుందని,  రేపు మనం డిజిటల్‌ బుక్‌ ఏమిటన్నది చూపిస్తామని జగన్ చెప్పుకొచ్చారు. 

ఈ యాప్ https://digitalbook.weysrcp.com/auth/phone లో ఆన్‌లైన్‌లో అందుబాటులో ఉంది . ఈ యాప్ ద్వారా ఎవరైనా తాము ఎదుర్కొన్న అన్యాయానికి సంబంధించిన వివరాలను నేరుగా అప్‌లోడ్ చేయవచ్చు. వెబ్‌సైట్‌తో పాటు, 040-49171718 ద్వారా IVRS కాల్ సౌకర్యం కూడా ఏర్పాటు చేయబడింది. అంటే బాధితులు ఎవరైనా కూడా ఫోన్ ద్వారా తమ ఫిర్యాదులను నమోదు చేసుకోవచ్చు అన్నమాట. 

యాప్ ద్వారా

• బాధితులు ముందుగా తమ ఫోన్ నంబర్ ద్వారా పోర్టల్‌లోకి లాగిన్ అవ్వాలి. 
• ఆ తరువాత ఒక డ్యాష్‌బోర్డ్ కనిపిస్తుంది. అందులో తమకు జరిగిన అన్యాయం, రాజకీయ వేధింపులు, అక్రమ కేసులు, లేదా ఇతర సమస్యల గురించి వివరంగా నమోదు చేయవచ్చు. 
• ఇందులో లోకేషన్ యాక్సెస్ ఉంటుంది. అలాగే కెమెరా యాక్సెస్ కూడా ఉంటుంది. సమస్యకు సంబంధించిన ఫోటోలు, వీడియోలు, డాక్యుమెంట్లు, ఇతర ఆధారాలను అప్‌లోడ్ చేసే చేయాలి.  
• నమోదు చేసిన ప్రతి ఫిర్యాదును ఒక పర్మనెంట్ డిజిటల్ డైరీలో శాశ్వతంగా భద్రపరుస్తారు. 
• భవిష్యత్తులో ఈ సమాచారం ప్రకారంగా చట్టపరమైన చర్యలు తీసుకుంటారు. 

కాల్ చేసి ఫిర్యాదు

• ఇక ఇంటర్నెట్ సౌకర్యం లేనివారు లేదా వెబ్‌సైట్ ఉపయోగించలేని వారు ఈ టోల్ ఫ్రీ నెంబర్‌కు కాల్ చేసి ఫిర్యాదు నమోదు చేయవచ్చు.  
• కాల్ చేసిన తర్వాత, ఆటోమేటెడ్ సిస్టమ్ ద్వారా వారు తమ సమస్యలను వాయిస్ రూపంలో రికార్డ్ చేస్తారు. 
• ఈ వాయిస్ రికార్డింగ్ కూడా డిజిటల్ బుక్‌లో నమోదు అవుతుంది. 
• వాయిస్ రికార్డింగ్ పూర్తయిన తర్వాత, ఆటోమేటెడ్ సిస్టమ్ వారికి ఒక ఫిర్యాదు రిఫరెన్స్ నెంబర్‌ను ఇస్తుంది.
• ఈ డిజిటల్ డేటా భవిష్యత్తులో వైసీపీ అధికారంలోకి వచ్చిన తర్వాత, ప్రత్యేక దర్యాప్తు బృందం (SIT) ఏర్పాటు చేసే అవకాశం కూడా ఉంది.