Ambati Rambabu : మాజీమంత్రి అంబటి రాంబాబుకు బిగ్ రిలీఫ్... బెయిల్ మంజూరు

Ambati Rambabu :  మాజీమంత్రి అంబటి రాంబాబుకు బిగ్ రిలీఫ్ దక్కింది. అంబటికి గుంటూరు కోర్టు బెయిల్‌ మంజూరు చేసింది. గతేగడాది నవంబర్‌ 12న నమోదైన కేసులో బెయిల్‌ మంజూరు చేస్తూ గుంటూరు కోర్టు తీర్పును వెలువరించింది. నవంబర్‌ 12న వైఎస్సార్‌సీపీ ప్రభుత్వ మెడికల్ కాలేజీల ప్రైవేటీకరణకు వ్యతిరేకంగా ర్యాలీ చేపట్టింది. ఆ ర్యాలీ నిర్వహించే సమయంలో అంబటి  తమ విధులకు ఆటంకం కలిగించారంటూ పోలీసులు అంబటిపై కేసు నమోదు చేశారు. తాజాగా అంబటి రాంబాబు కస్టడీ పిటిషన్‌ను ఎక్సైజ్ కోర్టు కొట్టేసింది. అలాగే ఆయనకు షరతులతో కూడిన బెయిల్ మంజూరు చేసింది. రూ.10 వేలతో పాటు రెండు పూచీకత్తులు సమర్పించాలని కోర్టు పేర్కొంది. కాగా తాజా, కోర్టు తీర్పుతో అంబటి రాంబాబు  జైలు నుంచి విడుదలయ్యే అవకాశం కనిపిస్తోంది.
 
 కాగా సీఎం చంద్రబాబు నాయుడుపై అనుచిత వ్యాఖ్యల కేసులో మంగళవారమే బెయిల్ లభించింది. అయినప్పటికీ అంబటి రాంబాబు జైల్లోనే ఉండాల్సిన పరిస్థితి ఏర్పడింది. ఛలో మెడికల్ కాలేజీ పిలుపు మేరకు నిర్వహించిన ఆందోళన కేసులో ఆయనకు కోర్టు 14 రోజులు రిమాండ్ విధించింది. ఆ కేసులో బెయిల్ వచ్చే వరకు అంబటి జైల్లోనే ఉండాల్సిన పరిస్థితి నెలకొంది. అ కేసుకు సంబంధించి ఈ రోజు బెయిల్‌ లభించడంతో ఆయన విడుదలకు మార్గం సుగమమైంది.