Davos Trip: డావోస్ పర్యటన పూర్తి చేసిన బాబు, రేవంత్..

Davos Trip: ఆంధ్రప్రదేశ్ ముఖ్యమంత్రి చంద్రబాబు నాయుడు(Chandrababu), తెలంగాణ ముఖ్యమంత్రి రేవంత్ రెడ్డి(Revanth Reddy) స్విట్జర్లాండ్‌లో జరిగిన డావోస్ వరల్డ్ ఎకనామిక్ ఫోరం పర్యటనను విజయవంతంగా పూర్తి చేసి భారత్‌కు తిరుగు ప్రయాణం ప్రారంభించారు.

చంద్రబాబు నాయుడు ఇప్పటికే భారత్‌కు బయలుదేరారు. ఆయన ఈరోజే ఉదయం 11:30 గంటల నుంచి అమరావతిలో అధికారిక కార్యక్రమాల్లో పాల్గొననున్నారు. నాలుగు రోజుల డావోస్ పర్యటనలో చంద్రబాబు మొత్తం 36కిపైగా కార్యక్రమాల్లో పాల్గొన్నారు.

ఈ పర్యటనలో ఆయన ఇజ్రాయెల్, యూఏఈ, స్విట్జర్లాండ్ ప్రతినిధులతో సమావేశాలు నిర్వహించారు. వరల్డ్ ఎకనామిక్ ఫోరం వేదికపై లక్ష్మీ మిట్టల్, థామస్ కురియన్, అరవింద్ కృష్ణ వంటి ప్రముఖ పారిశ్రామికవేత్తలతో సహా 16 మంది ప్రముఖ పరిశ్రమల అధిపతులతో చర్చలు జరిపారు.

ఆంధ్రప్రదేశ్‌లో గ్రీన్ ఎనర్జీ, ఆర్టిఫిషియల్ ఇంటెలిజెన్స్, వ్యవసాయం, పర్యాటకం రంగాల్లో జరుగుతున్న అభివృద్ధిని వారికి వివరించారు. అలాగే యూరప్‌లో ఉన్న తెలుగు ప్రజలతో కలిసి తెలుగు డయాస్పోరా కార్యక్రమంలో పాల్గొన్నారు.

అలాగే, తెలంగాణ ముఖ్యమంత్రి రేవంత్ రెడ్డి కూడా డావోస్‌లో తన పర్యటనను విజయవంతంగా ముగించారు. తెలంగాణ రైజింగ్ 2047 విజన్‌ను ప్రపంచ స్థాయిలో పరిచయం చేయాలన్న ఆయన లక్ష్యం ఈ ఫోరం ద్వారా నెరవేరింది.

మూడు రోజుల పర్యటనలో రేవంత్ రెడ్డి డేటా సెంటర్లు, గ్లోబల్ కెపబిలిటీ సెంటర్లు, గ్రీన్ ఎనర్జీ, తయారీ రంగాల్లో పెట్టుబడులను ఆకర్షించారు. ఆర్టిఫిషియల్ ఇంటెలిజెన్స్, సస్టెయినబిలిటీ తదితర రంగాల్లో పలు ఒప్పందాలు కూడా కుదిరాయి.

డావోస్ పర్యటనతో రెండు తెలుగు రాష్ట్రాలకు పెట్టుబడులు, అంతర్జాతీయ గుర్తింపు మరింత బలపడిందని రాజకీయ వర్గాలు చెబుతున్నాయి.