జ్ఞాన్‌వాపీ కేసులో అలహాబాద్ హైకోర్టు సంచలన తీర్పు!

Gyanvapi Masjid Case: జ్ఞాన్‌వాపీ క్యాంపస్‌లో ఏఎస్‌ఐ సర్వేకు సంబంధించి అలహాబాద్ హైకోర్టు(Allahabad High Court) తీర్పు వెలువరించింది. ఏఎస్ఐ సర్వే కొనసాగించేందుకు హైకోర్టు అనుమతించింది. అంతకుముందు, జూలై 27న జరిగిన విచారణలో, అన్ని పక్షాల వాదనలు విన్న తర్వాత, కోర్టు తీర్పును రిజర్వ్ చేసింది. తదుపరి ఆదేశాల వరకు ASI సర్వేపై స్టే విధించింది.

అలహాబాద్ హైకోర్టు ప్రధాన న్యాయమూర్తి ప్రీతికర్ దివాకర్ అంజుమన్ ఇంజామియా మసీదు కమిటీ పిటిషన్‌ను విచారించారు. దీనిపై రెండు రోజుల పాటు హైకోర్టులో వాదనలు జరిగాయి. అన్ని పార్టీలు తమ అభిప్రాయాన్ని తెలిపాయి. ఏఎస్‌ఐ సర్వేపై ఓ వైపు పట్టుబడుతుండగా, మరోవైపు ఏఎస్‌ఐ సర్వేను ముస్లిం పక్షాలు తీవ్రంగా వ్యతిరేకిస్తున్నారు. ఈ సందర్భంగా ఏఎస్‌ఐ అధికారులు కూడా కోర్టుకు హాజరయ్యారు. సర్వే వల్ల నిర్మాణానికి ఎలాంటి నష్టం వాటిల్లదని ఏఎస్‌ఐ అడిషనల్ డైరెక్టర్ జనరల్ అలోక్ త్రిపాఠి తెలిపారు.

వారణాసి జిల్లా కోర్టు ASI సర్వేను ఆమోదించింది. కాశీ విశ్వనాథ దేవాలయం సమీపంలోని మా శృంగార్ గౌరీ-జ్ఞాన్వాపి మసీదు కేసులో, వివాదాస్పద భాగాన్ని మినహాయించి మొత్తం జ్ఞానవాపి సముదాయంపై పురావస్తు పరిశోధనకు ఆదేశించింది. ఆగస్టు 4లోగా నివేదిక సమర్పించాలని ఏఎస్‌ఐని కోర్టు ఆదేశించింది. అయితే ఈ కేసులో అంజుమన్ ఇంజామియా మసీదు కమిటీ హైకోర్టులో అప్పీల్ చేసి ఏఎస్ఐ సర్వేపై స్టే విధించాలని డిమాండ్ చేసింది. దీనిపై కోర్టు తాజాగా తీర్పు వెలువరించింది.

మసీదు ప్రాంగణంలో శృంగార్ గౌరీ, ఇతర దేవతలను రోజువారీ పూజించే హక్కు డిమాండ్ తర్వాత తాజా జ్ఞానవాపి వివాదం తలెత్తింది. ఈ శిల్పాలు జ్ఞానవాపి మసీదు(Gyanvapi Masjid) వెలుపలి గోడపై ఉన్నాయి. 2021 ఆగస్టు 18న ఐదుగురు మహిళలు శృంగర్ గౌరీ ఆలయంలో రోజువారీ పూజలు, దర్శనం కోరుతూ కోర్టును ఆశ్రయించడంతో వివాదం మొదలైంది. వాస్తవానికి, ఇంతకుముందు ఈ సముదాయాన్ని సంప్రదాయం ప్రకారం సంవత్సరానికి రెండుసార్లు మాత్రమే పూజించేవారు, అయితే ఈ మహిళలు...ఇతర దేవతలకు ఎలా పూజలు నిర్వహిస్తున్నారో...ఇక్కడ కూడా అదే విధంగా రోజువారీ పూజలు నిర్వహించాలని...దేవతల ఆరాధనను అడ్డుకోవద్దని కోర్టును కోరారు.