Covishield Vaccine: సుప్రీంకోర్టుకు చేరిన కోవిషీల్డ్ వ్యాక్సిన్ వివాదం.. విచారణ కోసం పిటిషన్ వేసిన న్యాయవాది 

Covishield Vaccine: కోవిషీల్డ్ వ్యాక్సిన్ వివాదం ముదురుతోంది. కరోనా సమయంలో కోవిషీల్డ్ వ్యాక్సిన్ వేసుకున్న వారిలో రక్తం గడ్డ కడుతుందని యూకే కోర్టులో కోవిషీల్డ్ తయారీదారు ఆస్ట్రాజెనెకా (AstraZeneca) అంగీకరించిన విషయం తెలిసిందే. అయితే, దీనిపై భారత్ లోనూ విచారణ జరగాలని సుప్రీం కోర్టు మెట్లు ఎక్కారు న్యాయవాది  విశాల్ తివారీ. ఈమేరకు బుధవారం సుప్రీం కోర్టులో ఆయన పిటిషన్ దాఖలు చేశారు.  ఢిల్లీ సుప్రీం కోర్టులో కొవిషీల్డ్ వాక్సిన్ (Covishield Vaccine )సైడ్ ఎఫెక్ట్స్ పరిశీలనకు వైద్య నిపుణల కమిటి ఏర్పాటు చేయాలని పిటిషన్ లో కోరారు విశాల్ తివారి. 

“భారతదేశంలో 175 కోట్లకు పైగా కోవిషీల్డ్ డోస్‌లు అందించారు.  కోవిడ్ 19 తర్వాత గుండెపోటు అలాగే  వ్యక్తులు ఆకస్మికంగా కుప్పకూలడం వల్ల మరణాలు పెరిగాయి. యువకులలో కూడా గుండెపోటు కేసులు అనేకం ఉన్నాయి. ఇప్పుడు కోవిషీల్డ్ డెవలపర్ UK కోర్టులో దాఖలు చేసిన డాక్యుమెంట్ తర్వాత, పౌరులకు పెద్ద సంఖ్యలో అందించిన కోవిషీల్డ్ వ్యాక్సిన్ వలన వచ్చే ప్రమాదం అలాగే ప్రమాదకరమైన పరిణామాలపై మేము ఆలోచించవలసి వచ్చింది, ”అని న్యాయవాది విశాల్ తివారీ దాఖలు చేసిన పిటిషన్‌లో పేర్కొన్నారు.

Also Read: కోవిషీల్డ్ వ్యాక్సిన్ సైడ్ ఎఫెక్ట్స్ చాలా తక్కువ.. టెన్షన్ వద్దంటున్న నిపుణులు 

వ్యాక్సిన్‌ (Covishield Vaccine)ను అభివృద్ధి చేసిన ఆస్ట్రాజెనెకా కంపెనీ, కోవిడ్-19కి వ్యతిరేకంగా భారతదేశంలో కోవిషీల్డ్‌గా లైసెన్స్‌తో తయారు చేసిన AZD1222 వ్యాక్సిన్ తక్కువ ప్లేట్‌లెట్ గణనలకు అలాగే అరుదైన సందర్భాల్లో రక్తం గడ్డకట్టడానికి కారణమవుతుందని పేర్కొంది. థ్రోంబోసైటోపెనియా సిండ్రోమ్ (TTS)తో వ్యాక్సిన్ - థ్రాంబోసిస్ మధ్య సంబంధాన్ని ఆస్ట్రాజెనెకా అంగీకరించిందని, ఇది అసాధారణంగా తక్కువ స్థాయిలో ప్లేట్‌లెట్స్ అలాగే  రక్తం గడ్డకట్టడం ద్వారా వర్గీకరించిన  వైద్య పరిస్థితి అని మీడియా నివేదికలు పేర్కొన్నాయి. ఆస్ట్రాజెనెకా వ్యాక్సిన్ ఫార్ములా పూణేకి చెందిన వ్యాక్సిన్ తయారీదారు సీరం ఇన్‌స్టిట్యూట్ ఆఫ్ ఇండియా (SII)కి లైసెన్స్ పొందింది.

AIIMS నిపుణుల నేతృత్వంలోని ప్యానెల్..

AIIMS నిపుణుల నేతృత్వంలోని ప్యానెల్ ఏర్పాటు చేయాలని, మెడికల్ ప్యానెల్‌కు ఎయిమ్స్‌కు చెందిన నిపుణుడు నేతృత్వం వహించాలని, రిటైర్డ్ సుప్రీంకోర్టు న్యాయమూర్తి పర్యవేక్షించాలని పిటిషన్‌లో తివారి కోరారు. వ్యాక్సిన్  తీసుకున్న తర్వాత బలహీనపరిచే ఆరోగ్య వైఫల్యాలు లేదా మరణాలు కూడా ఎదుర్కొన్న పౌరులు లేదా కుటుంబాలు 'వ్యాక్సిన్ డ్యామేజ్ పేమెంట్ సిస్టమ్'ను ఏర్పాటు చేయడానికి కేంద్రానికి ఆదేశాలు ఇవ్వాలని తివారీ సుప్రీం కోర్టును అభ్యర్ధించారు. అలాగే, నకిలీ వ్యాక్సిన్‌ల ప్రసరణపై కఠిన చర్యలు తీసుకోవాలని కూడా పిటిషన్ విజ్ఞప్తి చేసింది.