ప్రధాని మోదీ వ్యాఖ్యలకు కౌంటర్‌ ఇచ్చిన మంత్రి కేటీఆర్‌

దేశ చరిత్రలోకే అత్యధిక నిరుద్యోగం సృష్టించి విఫలం అయిన ప్రధాని మోదీగా చరిత్రలో నిలుస్తారని మంత్రి కేటీఆర్ మండిపడ్డారు. కేంద్రం పరిధిలో 16 లక్షల ఖాళీలను మోదీ భర్తీ చేయలేదని, తెలంగాణలో 2.20 లక్షల ప్రభుత్వ ఉద్యోగాలను నింపిన తమపై విమర్శలు చేస్తున్నారని అది మోదీకి తగదని అన్నారు. బిల్లులను ఆమోదించకుండా తెలంగాణ వర్సిటీల్లో ఖాళీల భర్తీని గవర్నర్‌ ఆపుతున్నారని, బిల్లులను అడ్డుకుంటున్న గవర్నర్‌కు ప్రధాని మోదీ ఒక మాట చెబితే బాగుండేదన్నారు. గిరిజన విశ్వవిద్యాలయాన్ని అడ్డుకొని, అడవి బిడ్డల గురించి మాట్లాడటం ప్రధాని కపట ప్రేమకు నిదర్శనమన్నారు.

బయ్యారం ఫ్యాక్టరీ ఊసెక్కడా..?

15 వేల మంది స్థానికులకు ఉద్యోగాలిచ్చే బయ్యారం ఫ్యాక్టరీ గురించి ఒక్క మాట కూడా ప్రధాని మాట్లాడలేదని దుయ్యబట్టారు. నల్ల చట్టాలతో 700 మంది రైతులను పొట్టనబెట్టుకున్న ప్రధాని వ్యవసాయం గురించి మాట్లాడటం హాస్యాస్పదంగా ఉందన్నారు. తెలంగాణ రాష్ట్రం విషయంలో సవతి తల్లి ప్రేమను చూపుతున్నారని మండిపడ్డారు. పెండింగ్‌లో ఉన్న ప్రాజెక్ట్‌లను పూర్తి చేయకుండా టూర్‌కి వచ్చినట్లు వచ్చిపోతే ఏం లాభమని విమర్శించారు. అసలు విషయాన్ని తుంగలో తొక్కి డైవర్ట్ చేస్తున్నారని మంత్రి కేటీఆర్ అన్నారు.

మోదీ హెచ్చరికలకు మేం భయపడం

తెలంగాణ మా కుటుంబం.. రాష్ట్ర ప్రజలు మా కుటుంబ సభ్యులు. వారి అభివృద్ధికి పాటుపడుతున్న తెలంగాణ కుటుంబ పార్టీ మాది అని అన్నారు. కేంద్ర ఏజెన్సీల బూచి చూపించి ప్రధాని చేసిన హెచ్చరికలకు మేం భయపడబోమని స్పష్టం చేశారు. తెలంగాణకు వచ్చి ఇక్కడి ప్రభుత్వంపై విమర్శలు చేయడం, అసత్యాలు మాట్లాడటం మోదీకి అలవాటుగా మారిందని మంత్రి కేటీఆర్‌ ప్రధాని మోదీపై మండిపడ్డారు.