AI Job Loss Predictions: ఉద్యోగులపై AI బాంబు..? వచ్చే 10 ఏళ్లలో 30 లక్షల ఉద్యోగాలు ఫసక్!

AI Job Loss Predictions: ఒక కొత్త అధ్యయనం ప్రకారం, వచ్చే దశాబ్దంలో యుకేలో సుమారు 30 లక్షల తక్కువ నైపుణ్య ఉద్యోగాలు ఆర్టిఫిషియల్ ఇంటెలిజెన్స్ (AI), ఆటోమేషన్ వల్ల పూర్తిగా మాయం కావచ్చు. టెక్నాలజీ వేగంగా మారుతున్నందున, పునరావృతమైన పనులు చేసే ఉద్యోగాలు మొదటగా ప్రభావితమవుతాయని పరిశోధకులు చెబుతున్నారు. అయితే అదే సమయంలో, అధిక నైపుణ్యం అవసరమైన ఉద్యోగాల డిమాండ్ మాత్రం పెరుగుతుందని ఈ అధ్యయనం స్పష్టం చేస్తోంది.

ఏ ఉద్యోగాలు ఎక్కువ ప్రమాదంలో ఉన్నాయి? AI Job Loss Predictions

NFER (National Foundation for Educational Research) చేసిన ఈ అధ్యయనం ప్రకారం, ముఖ్యంగా క్రింది ఉద్యోగాలు AI వల్ల త్వరగా మాయం కావచ్చు:

• ఆఫీస్ అడ్మిన్ అసిస్టెంట్లు
• ఫ్యాక్టరీ కార్మికులు
• మెషిన్ ఆపరేటర్లు
• గోదాం ఉద్యోగులు
• కాషియర్లు
• ప్లంబింగ్, రూఫింగ్, ఎలక్ట్రికల్ వర్క్ వంటి కొన్ని చేతి పనులు

ఇవి ఎక్కువగా పునరావృతమైన పనులు, ఒకే విధంగా జరిగే పనులు కావడంతో, రోబోట్స్, AI సిస్టమ్స్ ఈ పనులను సులువుగా చేయగలవు.

ఏ ఉద్యోగాలు సురక్షితంగా ఉంటాయి?

అయితే, సృజనాత్మకత, ఎమోషన్స్ అర్థం చేసుకోవడం, క్లిష్ట నిర్ణయాలు తీసుకోవడం వంటి నైపుణ్యాలు అవసరమైన ఉద్యోగాలు AI పూర్తిగా తీసుకోలేవని నివేదిక చెబుతోంది. వాటిలో ముఖ్యంగా:

• న్యాయ రంగం
• మేనేజ్‌మెంట్
• హెల్త్‌కేర్
• ఎడ్యుకేషన్
• సైకాలజీ

ఇలాంటి రంగాల్లో AI మనుషులను రీప్లేస్ చేయలేదు. కానీ ఉద్యోగుల పనిని వేగంగా, సులభంగా చేయడానికి సహాయపడుతుంది. ఉదాహరణకు, న్యాయవాదులు డాక్యుమెంట్లు తయారు చేయడం, రీసెర్చ్ చేయడం వంటి పనుల్లో AI ని ఎక్కువగా వాడవచ్చు. అధిక నైపుణ్య ఉద్యోగాలకు డిమాండ్ పెరుగుతుంది.. ఇంజినీర్లు, శాస్త్రవేత్తలు, టీచర్లు వంటి ఉద్యోగాలు ఇక ముందు మరింత డిమాండ్‌లో ఉంటాయని పరిశోధకులు అంటున్నారు. టెక్నాలజీ వల్ల పనులు వేగంగా సాగుతాయి; అందువల్ల నైపుణ్యం ఉన్నవారి అవసరం ఎక్కువ అవుతుంది.

AI వల్ల అంతా ఉద్యోగాలు పోతాయా? నిపుణుల ఆందోళనలు.. ఈ నివేదిక రచయితల్లో ఒకరైన జూడ్ హిల్లరీ మాట్లాడుతూ, AI ఉద్యోగాలను నాశనం చేస్తుందనే భయం కొంచెం అతిశయోక్తి కావచ్చని చెప్పారు. ఇంకా ఆయన అభిప్రాయం ఇలా ఉంది..  AI ఏ రంగాన్ని ఎంతవరకు ప్రభావితం చేస్తుందో ఇంకా స్పష్టత లేదు.

చాలా మంది ఎంప్లొయీస్ AI గురించి ఆందోళనలో ఉన్నారు కానీ వాస్తవ పరిస్థితులు ఇంకా పూర్తిగా తెలియవు. తక్కువ నైపుణ్యం ఉన్న ఉద్యోగులు కొత్త ఉద్యోగాలకు మారడం చాలా కష్టం. అందువల్ల, వచ్చే సంవత్సరాల్లో రీ ట్రైనింగ్ (కొత్త నైపుణ్యాలు నేర్చుకోవడం) కీలకం కానుంది. ఇతర అధ్యయనాలు కూడా ఇదే ధోరణిని చూపుతున్నాయి. ఇటీవల వచ్చిన మరికొన్ని అధ్యయనాలు కూడా AI ఉద్యోగాలపై పెద్ద ప్రభావం చూపుతుందని చెబుతున్నాయి. ఉదాహరణకు.. కింగ్స్ కాలేజ్ చేసిన ఒక అధ్యయనం ప్రకారం, అధిక జీతాలు ఇచ్చే కంపెనీలు కూడా AI వల్ల ఉద్యోగులను కోల్పోతున్నాయి.

UK ప్రభుత్వం విడుదల చేసిన జాబితాలో మేనేజ్‌మెంట్ కన్సల్టెంట్లు, లాయర్లు, సైకాలజిస్టులు వంటి రంగాలు AI ప్రభావానికి ఎక్కువగా గురయ్యే అవకాశం ఉందని తెలిపింది. క్రీడాకారుల ఉద్యోగాలు మాత్రం సురక్షితంగా ఉండే అవకాశం ఎక్కువ. ఇప్పటికే ఉద్యోగ కోతలు ప్రారంభం, AI ప్రభావం ప్రపంచవ్యాప్తంగా కనిపిస్తోంది. ఇటీవల..  క్లిఫర్డ్ ఛాన్స్ తన సిబ్బందిలో 10% మందిని తొలగించింది. PwC కంపెనీ పెద్ద ఎత్తున నియామకాలు చేయాలనే ప్లాన్‌ను తగ్గించింది. Apple కొన్ని సేల్స్ టీమ్ ఉద్యోగాలను తగ్గించింది. Google 100 మందికి పైగా డిజైన్ టీమ్ ఉద్యోగులను తొలగించింది. ఈ కోతలు AI వల్లేనా లేక ఆర్థిక మాంద్యం వల్లనా అనేది ఇంకా స్పష్టంగా లేదు.

మొత్తానికి, AI ప్రవేశంతో భవిష్యత్తులో ఉద్యోగాల్లో పెద్ద మార్పులు అనివార్యం. కొందరి ఉద్యోగాలు మాయం కావచ్చు, మరికొన్ని పెరుగుతాయి. ముఖ్యంగా తక్కువ నైపుణ్య ఉద్యోగాలు ప్రమాదంలో ఉండగా, అధిక నైపుణ్యం ఉన్న ఉద్యోగాలు మరింత డిమాండ్ పొందనున్నాయి. అందువల్ల, వచ్చే సంవత్సరాల్లో ఉద్యోగులు కొత్త నైపుణ్యాలు నేర్చుకోవడం చాలా ముఖ్యమవుతుంది.