ఒడిశాలోని పూరి పుణ్యక్షేత్రం భక్తుల జనసందోహంతో నిండిపోయింది. ఇక్కడ కొలువైన జగన్నాథుడి రథయాత్ర మంగళవారం ప్రారంభం అవుతుంది. హిందూ క్యాలెండర్ ప్రకారం ప్రతిఏడాది ఆషాడ మాసం శుక్లపక్షం విదియ రోజున జగన్నాథుడి రథయాత్ర ప్రారంభం అవుతుంది. ఈ యాత్ర ఏకాదశి వరకు కొనసాగుతుంది. ఈ జగన్నాథుడి రథయాత్రలో పాల్గొనేందుకు దేశ విదేశాల నుంచి భక్తులు పెద్దెత్తున తరలివస్తుంటారు. దీంతో పూరి నగరమంతా భక్తుల జనసందోహంతో కిటకిటలాడుతుంది.
పురాణాల ప్రకారం జగన్నాథుడు తన చెల్లెలు సుభద్ర, అన్న బలభద్రుడులతో కలిసి నగరమంతా రథంలో విహరిస్తారు. ఈ యాత్ర కోసం ప్రత్యేకంగా ఒక పెద్ద చెక్క రథాన్ని కూడా సిద్దం చేశారు. ఈ రథాన్ని లాగినా..రథం తాళ్లను తాకినా..లేదంటే కదలించినా..ఎంతో పుణ్యం దక్కుతుందని భక్తుల నమ్మకం. ఈ రథయాత్ర పూరిలోనే కాకుండా దేశంలోని అనేక ప్రాంతాల్లో నిర్వహిస్తారు. దేశ రాజధాని ఢిల్లీ, భోపాల్, పంజాబ్, ఆంధ్రప్రదేశ్‌, తెలంగాణలోని కొన్ని ప్రాంతాల్లో జగన్నాథుని రథయాత్ర వైభవంగా జరుగుతుంది.
రథయాత్ర ప్రాముఖ్యత:
హిందూ క్యాలెండర్ ప్రకారం, రథయాత్ర ఆషాఢ మాసంలోని శుక్ల పక్షం రెండవ తేదీన జరుగుతుంది. ఈ రథయాత్ర పండుగ మొత్తం 10 రోజుల పాటు వైభవంగా జరుపుకుంటారు. ఈ రోజున, జగన్నాథుడు అన్నయ్య బలరాముడు, సోదరి సుభద్రతో కలిసి పూరి నగర పర్యటనకు బయలుదేరుతాడు. ఈ సమయంలో, ముగ్గురి విగ్రహాలను వేర్వేరు రథాలలో ప్రతిష్టించడం ద్వారా రథయాత్ర చాలా గొప్ప పద్ధతిలో జరుగుతుంది. ఈ రథయాత్ర సామరస్యం, సోదరభావం ఐక్యతకు చిహ్నం. ఈ యాత్రలో పాల్గొనేందుకు, స్వామివారి రథాన్ని లాగే భాగ్యం పొందేందుకు దేశంలోని వివిధ మూలల నుండి పెద్ద సంఖ్యలో భక్తులు ఇక్కడికి వస్తుంటారు. రథయాత్రలో ఎవరైతే పాల్గొంటారో వారికి సర్వ విధాల సుఖ సంతోషాలు లభిస్తాయని నమ్ముతుంటారు.
రథయాత్రకు సంబంధించి నమ్మకాలు:
పౌరాణిక విశ్వాసాల ప్రకారం, రథయాత్ర సమయంలో, జగన్నాథుడు, బలభద్రుడు, సుభద్ర దేవి రథంపై కూర్చొని వారి గుండిచా ఆలయానికి వెళతారు. గుండిచా దేవాలయం జగన్నాథుడి అత్తగారి ఇల్లు అని చెబుతుంటారు. ఇక్కడ ఈ ముగ్గురు 7 రోజులు విశ్రాంతి తీసుకుంటారు. దీని తరువాత, ఆషాడ శుక్ల పక్షం దశమి తిథి నాడు జగన్నాథుడు, బలభద్రుడు, సుభద్రా దేవిని తిరిగి ఆలయానికి చేరుకుంటారు.
