డిఫెన్స్ రంగంలో ఇండియా మరో విజయం.. ఇక సముద్రంలోంచి అణు దాడులే!

భారత్ రక్షణ రంగం మరో చారిత్రాత్మక మైలురాయిని అధిగమించింది. శత్రువుల వెన్నులో వణుకు పుట్టించేలా, సముద్ర గర్భం నుంచి అణు దాడులు చేయగల 'కే-4' (K-4) బాలిస్టిక్ క్షిపణిని భారత్ విజయవంతంగా పరీక్షించింది. 2025 డిసెంబర్ 23న బంగాళాఖాతంలో స్వదేశీ అణు జలాంతర్గామి ఐఎన్ఎస్ అరిఘాత్ నుండి ఈ ప్రయోగాన్ని నిర్వహించారు.

⭐️ India successfully test-fired the K-4 submarine-launched ballistic missile from INS Arighaat in Bay of Bengal, off Visakhapatnam
Range: 3,500 km

K-4 strengthens India’s sea-based nuclear deterrence and completes a key part of the nuclear triad.. land, air, and undersea launch… pic.twitter.com/GkHyfMIRIp

— Nabila Jamal (@nabilajamal_) December 25, 2025

శత్రువుల కన్నుగప్పి..

DRDO, ఇండియన్ నేవీ ఈ క్షిపణి పరీక్ష సీక్రెట్‌గా నిర్వహించింది. శత్రు దేశాలకు ఈ విషయం తెలియకుండా అత్యంత గోప్యతను పాటించాయి. వాస్తవానికి ఈ పరీక్ష డిసెంబర్ మొదటి వారంలోనే జరగాల్సి ఉంది. అయితే, ఆ సమయంలో బంగాళాఖాతంలో చైనాకు చెందిన నిఘా నౌకలు సంచరిస్తుండటంతో, మన క్షిపణి సమాచారం శత్రువులకు చిక్కకుండా ఉండేందుకు ప్రయోగాన్ని వాయిదా వేశారు. ఈ పరీక్షలో క్షిపణి తన గరిష్ట పరిధిని చేరుకుని, నిర్దేశిత లక్ష్యాన్ని అత్యంత ఖచ్చితత్వంతో ఛేదించిందని అధికారిక వర్గాలు తెలిపాయి.

కే-4 క్షిపణి ప్రత్యేకతలు

కే-4 క్షిపణి భారత్ వద్ద ఉన్న అత్యంత శక్తివంతమైన సబ్‌మెరైన్ లాంచ్డ్ బాలిస్టిక్ క్షిపణులలో ఒకటి. ఈ క్షిపణి సుమారు 3,500 కిలోమీటర్ల దూరంలోని టార్గెట్‌లను అటాక్ చేయగలదు. దీనివల్ల హిందూ మహాసముద్రం నుంచి ఆసియాలోని ప్రధాన ప్రాంతాలను భారత్ గురిపెట్టగలదు. ఇది సుమారు 2 టన్నుల బరువున్న అణ్వాయుధాలను మోసుకెళ్లగలదు. ఇది 'కోల్డ్ లాంచ్' పద్ధతిలో పనిచేస్తుంది. అంటే క్షిపణి మొదట నీటి ఉపరితలం పైకి వచ్చి, ఆ తర్వాతే దాని మోటార్లు మండి లక్ష్యం వైపు దూసుకెళ్తుంది. 12 మీటర్ల పొడవు, 17 టన్నుల బరువు కలిగిన ఈ క్షిపణిని అరిహంత్ తరగతి జలాంతర్గాముల కోసం ప్రత్యేకంగా రూపొందించారు.

INS Arighaat (S3) has been fitted with K-4 (3,500 km) nuclear missiles. pic.twitter.com/PyjhANRFc3

— News IADN (@NewsIADN) September 6, 2024

‘అణు త్రయం’ బలోపేతం 

ఈ ప్రయోగం విజయవంతం కావడంతో భారత్ యొక్క 'అణు త్రయం' సామర్థ్యం మరింత బలోపేతమైంది. భూమి (అగ్ని క్షిపణులు), ఆకాశం (యుద్ధ విమానాలు) తర్వాత ఇప్పుడు సముద్రం (INS అరిఘాత్ + K-4) నుండి కూడా భారత్ అణు దాడులను సమర్థవంతంగా నిర్వహించగలదు. శత్రువు మనపై మొదటి దాడి చేసినప్పటికీ, సముద్రం లోపల దాగి ఉన్న అణు జలాంతర్గాముల ద్వారా తిరిగి తీవ్రమైన ప్రతిదాడి చేసే 'సెకండ్ స్ట్రైక్' సామర్థ్యం భారత్‌కు చేకూరింది.