స్వతంత్రం వచ్చి 78 ఏళ్ల తర్వాత ఫస్ట్ టైం ఆ ఊరికి రోడ్డు

భారతదేశానికి స్వాతంత్ర్యం వచ్చి దశాబ్దాలు గడిచినా, సాంకేతికతలో ప్రపంచంతో పోటీ పడుతున్నా.. నేటికీ కొన్ని గ్రామాలు కనీస సౌకర్యాలకు ఆమడ దూరంలోనే ఉన్నాయి. హిమాచల్ ప్రదేశ్‌లోని కులు జిల్లాలో ఉన్న 'శక్తి' అనే కుగ్రామం దీనికి ప్రత్యక్ష నిదర్శనం. సముద్ర మట్టానికి వేల అడుగుల ఎత్తులో, గ్రేట్ హిమాలయన్ నేషనల్ పార్క్ సమీపంలో ఉండే ఈ గ్రామానికి 78 ఏళ్ల తర్వాత తొలిసారిగా రహదారి సౌకర్యం ఏర్పడింది.

ఇప్పటివరకు ఈ గ్రామ ప్రజలు బయటి ప్రపంచంతో సంబంధం కలిగి ఉండాలంటే కిలోమీటర్ల కొద్దీ నిటారైన కొండలను కాలి నడకన దాటాల్సి వచ్చేది. అత్యవసర వైద్యం కావాలన్నా, నిత్యావసర వస్తువులు తెచ్చుకోవాలన్నా గుర్రాలు లేదా మనుషుల వీపులపై మోయడం తప్ప మరో మార్గం ఉండేది కాదు. అటవీ నిబంధనలు, కఠినమైన భౌగోళిక పరిస్థితుల వల్ల ఇక్కడ రహదారి నిర్మాణం దశాబ్దాలుగా సాధ్యపడలేదు. అయితే, రాష్ట్ర ప్రభుత్వం ప్రజా ప్రతినిధుల చొరవతో ఎట్టకేలకు మట్టి రోడ్డు పనులు పూర్తి కావడంతో గ్రామానికి తొలి వాహనం చేరుకుంది.

हिमाचल | मंडी: आजादी के 78 वर्षों बाद सड़क सुविधा से जुड़ा तुमन गांव में पहली बार परिवहन बस पहुँचने पर खुशी में झूमे ग्रामीण.#HimachalPradeshpic.twitter.com/nvcglb42RR

— NDTV India (@ndtvindia) January 1, 2026

గ్రామానికి తొలిసారిగా ట్రాక్టర్, కారు చేరుకోవడంతో శక్తి గ్రామ ప్రజల ఆనందానికి అవధులు లేవు. గ్రామస్థులు వాహనాలకు పూలమాలలు వేసి, హారతులు ఇచ్చి ఘనంగా స్వాగతం పలికారు. "మా తాత ముత్తాతలు ఈ రోడ్డు కోసం కలలు కన్నారు. మా జీవితకాలంలో వాహనం గ్రామానికి వస్తుందని ఊహించలేదు" అని వృద్ధులు కన్నీటి పర్యంతమయ్యారు.

ఈ రోడ్డు సౌకర్యంతో కేవలం రవాణా మాత్రమే కాదు, విద్య, వైద్యం కూడా చేరువ కానున్నాయి. ముఖ్యంగా గర్భిణీ స్త్రీలు, వృద్ధులు అనారోగ్యం బారిన పడినప్పుడు డోలీల (మనుషులు మోసే కర్రలు)పై తీసుకెళ్లాల్సిన అవస్థలు తప్పుతాయి. పర్యాటక పరంగా కూడా ఈ ప్రాంతం అభివృద్ధి చెందే అవకాశం ఉంది.

ప్రస్తుతానికి ఇది మట్టి రోడ్డు అయినప్పటికీ, రాబోయే రోజుల్లో దీనిని పూర్తిస్థాయి పక్కా రహదారిగా మారుస్తామని అధికారులు హామీ ఇచ్చారు. 78 ఏళ్ల తర్వాత చీకటి వీడి వెలుగు రేఖలు ప్రసరించిన ఈ గ్రామం, నేడు నవ భారత్ అభివృద్ధికి చిహ్నంగా నిలిచింది.