ఆరోగ్యంగా ఉండటానికి మొదటిగా చేయాల్సిన పని సరైన, ఆరోగ్యకరమైన ఆహారం తీసుకోవాలి. ఆహరం విషయానికి వస్తే   చాలా మంది ఇంట్లో వంట చేసేటప్పుడు తెలిసి తెలియక ఆహారాన్ని పోషకమైనదిగా మార్చడానికి బదులుగా, దానిని మరింత అనారోగ్యకరంగా మారుస్తుంది.  అవేంటో ఇక్కడ తెలుసుకుందాం..  

తొక్క తీయడం

 చాలా మంది ప్రతి కూరగాయల తొక్కను తీసి పొరపాటు చేస్తారు. ఇలా చేయడం అస్సలు సరైనది కాదు ఎందుకంటే అనేక కూరగాయల తొక్కలలో  పోషకాలు సమృద్ధిగా ఉంటాయి. వాటిలో వివిధ ఫైటోన్యూట్రియెంట్లు, ఇనుము, విటమిన్ కె, బి, యాంటీఆక్సిడెంట్లు మొదలైనవి ఉంటాయి. వాటిని పారవేయడం వల్ల కూరగాయాల్లో  పోషక విలువలు తగ్గుతాయి. బంగాళాదుంప, క్యారెట్, వంకాయ, దోసకాయ, బీట్‌రూట్ వంటి కొన్ని కూరగాయల తొక్కలను పారవేయకూడదు.

మళ్లీ వేడి చేయడం

చాలా మంది ఆహారాన్ని  మళ్లీ మళ్లీ వేడి చేస్తుంటారు.  తినే ప్రతిసారీ ఆహారాన్ని వేడి చేయడం ద్వారా రుచి తగ్గిపోతుంది. ఇలా చేయడం ఆరోగ్యానికి కూడా అస్సలు మంచిది కాదు. ఆహారాన్ని మళ్లీ మళ్లీ వేడి చేయడం వల్ల అందులోని  పోషకాలు తగ్గడం ప్రారంభిస్తాయి. అంతేకాదు కొన్ని ఆహార పదార్థాలను పదే పదే వేడి చేయడం వల్ల విషపదార్థాలుగా మారడం ప్రారంభిస్తాయి. ఇవి  తింటే కడుపు సమస్యలు తలెత్తుతాయి.

ఎక్కువగా ఉడికించడం

కొంతమంది ఆహారాన్ని ఎక్కువగా ఉడికించడం చేస్తుంటారు.  ముఖ్యంగా కూరగాయలను ఎక్కువసేపు ఉడికించడం వల్ల ఉడికించడం వల్ల వాటిలోని పోషకాలు తగ్గుతాయి. ప్రతి కూరగాయకు ఒక నిర్దిష్ట వంట సమయం ఉంటుంది. ఆ సమయం కంటే ఎక్కువసేపు ఉడికించడం వల్ల పోషక విలువలు తగ్గుతాయి. 

 వంట పద్ధతి

వేయించడం, ఉడకబెట్టడం, పాన్ ఫ్రై చేయడం, బేక్ చేయడం వంటి అనేక వంట పద్ధతులు ఉన్నాయి. ఈ వంట పద్ధతుల్లో కొన్ని ఆరోగ్యకరమైనవి, మరికొన్ని ఆరోగ్యానికి  మంచివి కావు. ఆహారాన్ని వండడానికి  ఉడకబెట్టడం, బేకింగ్ వంటి ఆరోగ్యకరమైన వంట పద్ధతులను ఎక్కువగా ఉపయోగించాలి. వేయించిన ఆహారాలకు వీలైనంత దూరంగా ఉండాలి.