అసెంబ్లీలో బాంబ్ పేల్చిన గోషామహల్ ఎమ్మెల్యే..సంచలన వ్యాఖ్యలు!

గోషామహల్ ఎమ్మెల్యే రాజాసింగ్ అసెంబ్లీలో బాంబు పేల్చారు. వచ్చే అసెంబ్లీలో తాను సభలో ఉండకపోవచ్చన్నారు. ఇంటా.. బయటా కూడా తాను అసెంబ్లీలో అడుగు పెట్టొద్దని కోరుకుంటున్నారని సంచలన వ్యాఖ్యలు చేశారు. అసెంబ్లీలో తాను ఉన్నా.. లేకున్నా ధూల్ పేట్ నియోజక వర్గాన్ని మాత్రం తప్పని సరిగా అభివృద్ధి చేయాలని గోషామహల్ ఎమ్మెల్యే రాజాసింగ్ స్పీకర్ ను కోరారు.

ఇక అసెంబ్లీ సాక్షిగా సీఎం కేసీఆర్ ధూల్ పేట్ లో పర్యటిస్తానని, అభివృద్ధికి కట్టుబడి ఉంటానని చెప్పి మాట తప్పారని ఆయన అన్నారు.కాగా, అసెంబ్లీలో సమావేశాల్లో మొదటి రోజే బీజేపీ ఎమ్మెల్యే రాజాసింగ్ కు చేదు అనుభవం ఎదురైంది. ప్రశ్నోత్తరాల సమయంలో రాజాసింగ్ ను ఉద్దేశించి మంత్రి కేటీఆర్ చేసిన వ్యాఖ్యలు ఇప్పుడు చర్చనీయాంశంగా మారాయి. ఎస్ఆర్ డీపీ పనులకు సంబంధించి ప్రతిపక్షాలు అడిగిన ప్రశ్నకు సమాధానం చెబుతున్న క్రమంలో..కేటీఆర్ మాట్లాడుతూ.. రాజాసింగ్ ను అసలు మీరు బీజేపీ ఎమ్మెల్యేనే కాదని.. ఆ విషయం మీకు తెలియదేమోనని సైటైర్ వేశారు.

అయితే నిన్న బీఏసీ సమావేశం జరిగిందని బీజేపీ పార్టీ నాయకుడు ఒకరు నెల రోజుల పాటు సభ నిర్వహించాలని లేఖ రాస్తే.. కాంగ్రెస్ ఎమ్మెల్యేలు ఏమో 20 రోజులు సభ జరపాలని డిమాండ్ చేస్తున్నారని మంత్రి కేటీఆర్ అన్నారు. తీరా చూస్తే.. ప్రశ్నోత్తరాల సమయంలో మా పార్టీకి చెందిన ఎమ్మెల్యేలందరూ సభలో ఉంటే.. కాంగ్రెస్ ఎమ్మెల్యే ఒకరు.. బీజేపీకి చెందిన ఎమ్మెల్యే ఒకరు మాత్రమే ఉన్నారని ఆయన విమర్శించారు. ఇక దీనికి రియాక్ట్ అవుతూ.. గోషామహల్ ఎమ్మెల్యే రాజాసింగ్ తాను కూడా సభలోనే ఉన్నానని అన్నారు. వెంటనే అందుకున్న కేటీఆర్ మీరు ఇప్పుడు బీజేపీ ఎమ్మెల్యే కాదు.. మీరు ఈ విషయాన్ని మర్చిపోయినట్టు ఉన్నారని సెటైర్ వేశారు.

కాగా, బీజేపీ ఎమ్మెల్యే రాజాసింగ్ పై ఆ పార్టీ ఇంకా సస్పెన్షన్ ను ఎత్తివేయలేదు. ఏడాది గడిచిపోయినా సస్పెన్షన్ ఎత్తివేయకపోవడంతో ఆయన తీవ్ర నిరాశలో ఉన్నారు. బండి సంజయ్ అధ్యక్షుడిగా ఉన్న సమయంలో కూడా  ఆయన సస్పెన్షన్ ఎత్తివేయడం కోసం తీవ్ర ప్రయత్నాలు చేశారు. కాని ఫలించలేదు. కొన్ని సార్లు విజయశాంతి కూడా ట్వీట్ రూపంలో ఈ విషయంలో హైకమాండ్ పై అసంతృప్తిని వ్యక్తం చేశారు.

కాని అధిష్టానం మాత్రం రాజాసింగ్ పై సస్పెన్షన్ ఎత్తేసే విషయంలో నిర్ణయాన్ని వాయిదా వేస్తూ వస్తుంది. ఈ క్రమంలో ఆయన పార్టీ మారుతారని కూడా పెద్ద ఎత్తున ప్రచారం సాగుతోంది. మరి త్వరలోనే ఎన్నికల రానున్న సమయంలో ఇప్పుడైనా అధిష్టానం ఆయనపై ఉన్న సస్పెన్షన్ ను ఎత్తేస్తుందో లేదో.. అదే విధంగా మళ్లీ గోషామహల్ టికెట్ ఇస్తుందో లేదో అన్నది ఆసక్తికరంగా మారింది.