Manipur violence : మణిపూర్ ఘటనలో నలుగురు అరెస్టు...నిందితుల ఇంటికి నిప్పు..!!

మే 4న మణిపూర్‌లో ఇద్దరు మహిళలపై అత్యాచారం చేసిన కేసులో ఇప్పటివరకు నలుగురు నిందితులను పోలీసులు అరెస్టు చేశారు. కాంగ్‌పోక్పి జిల్లాలో ఇద్దరు గిరిజన మహిళలను వివస్త్రను చేసి ఊరేగించిన గుంపులో నిందితులుగా ఉన్నారు. అంతకుముందు, ముఖ్యమంత్రి ఎన్ బీరెన్ సింగ్ విలేకరుల సమావేశంలో మాట్లాడుతూ, ఇద్దరు నిందితులను అరెస్టు చేశామని, మిగిలిన నిందితుల కోసం అన్వేషణ కొనసాగుతోందని చెప్పారు. కొన్ని గంటల తర్వాత మరో ఇద్దరు నిందితులను అరెస్టు చేశారు.

మణిపూర్‌లో కుకీ-జోమి కమ్యూనిటీకి చెందిన ఇద్దరు మహిళలను నగ్నంగా ఊరేగించి, లైంగిక వేధింపులకు గురిచేసిన వీడియో కనిపించిన కొద్ది రోజుల తర్వాత, ప్రధాన నిందితుడు హుయిరేమ్ హెరోదాస్ మెయిటీతో సహా నలుగురిని ఈ కేసులో ప్రమేయం ఉన్నందుకు అరెస్టు చేశారు.

దేశం ఎలా స్పందించింది?
ఈ ఘటన దేశవ్యాప్తంగా దుమారం రేపింది. బీజేపీ పాలిత మణిపూర్‌లో పరిస్థితిపై వివరణాత్మక చర్చకు ప్రతిపక్షాలు ఒత్తిడి చేస్తున్నాయి. అదే సమయంలో, గురువారం మణిపూర్‌లో జరిగిన సంఘటన "సిగ్గుచేటు" అని పిఎం నరేంద్ర మోడీ అన్నారు. మహిళల భద్రతకు హామీ ఇవ్వాలని రాష్ట్ర ప్రభుత్వాలకు పిలుపునిచ్చారు. మణిపూర్‌లో జరిగిన ఘటనపై సుప్రీంకోర్టు కూడా "తీవ్ర ఆందోళన" వ్యక్తం చేసింది. నేరస్తులను న్యాయస్థానం ముందుకు తీసుకురావడానికి తీసుకున్న చర్యల గురించి తెలియజేయాలని రాష్ట్ర, కేంద్ర ప్రభుత్వాలను కోరింది.

నిందితుల ఇంటికి నిప్పు:

నిందితులలో ఒకరైన హుయిరేమ్ హెర్దాస్ సింగ్‌ను తౌబల్ జిల్లా నుండి అరెస్టు చేశారు. ఇద్దరు గిరిజన మహిళలను వెళ్లనివ్వకముందే ఆ గుంపు వారిపై లైంగిక దాడికి పాల్పడినట్లు ఆరోపణలు వచ్చాయి. ఇదే ఘటనలో నిందితుడు హెరాదాస్ సింగ్ ఇంటిని గ్రామస్థులు తగులబెట్టి, అతని కుటుంబాన్ని చిత్రహింసలకు గురిచేశారు.

నేరస్తులకు మరణశిక్ష విధించాలి - బీరెన్ సింగ్
ముఖ్యమంత్రి ఎన్. బీరెన్ సింగ్ ఈ సంఘటనను "అమానవీయమైనది"గా అభివర్ణించారు. నేరస్తులకు మరణశిక్ష విధించాలని అన్నారు. ఈ ఘటనను తీవ్రంగా ఖండిస్తున్న ముఖ్యమంత్రి, ఇది మానవత్వానికి వ్యతిరేకంగా జరిగిన నేరంగా అభివర్ణించారు. .ఈ దారుణమైన నేరంపై తమ ప్రభుత్వం మౌనం వహించదని అన్నారు. వీడియో చూసిన వెంటనే సైబర్ క్రైమ్ డిపార్ట్‌మెంట్‌ని వెరిఫై చేయాల్సిందిగా కోరామని, నిందితులను పట్టుకునేందుకు భారీ సెర్చ్ ఆపరేషన్ ప్రారంభించాలని అధికారులను ఆదేశించామని ముఖ్యమంత్రి తెలిపారు. వివిధ ప్రజా సంఘాలు, పారిశ్రామికవేత్తలు, వివిధ వర్గాల చర్చలు జరపడం ద్వారా రాష్ట్రంలో శాంతి, సుస్థిరతలను పునరుద్ధరించేందుకు తమ ప్రభుత్వం అన్ని విధాలా కృషి చేస్తోందని సింగ్ తెలిపారు.

ఏం జరిగింది?
కుకీ-జోమి కమ్యూనిటీకి చెందిన ఇద్దరు మహిళలను నగ్నంగా ఊరేగించి, లైంగిక వేధింపులకు గురిచేస్తున్నట్లు చూపించే వీడియో బుధవారం సోషల్ మీడియాలో వైరల్ అయ్యింది, ఇది ఇప్పటికే జాతి సంఘర్షణతో దెబ్బతిన్న రాష్ట్రంలో పరిస్థితిని మరింత దిగజార్చింది. ఈ ఘర్షణల్లో ఇప్పటి వరకు దాదాపు 140 మందికి పైగా మరణించారు.