Uppal Chain Snatching: వీడు మామూలు దొంగ కాదు.. ఫాలో చేస్తూ చైన్ స్నాచింగ్.. వీడియో..!

Uppal Chain Snatching: హైదరాబాద్(Hyderabad) నగరంలో చోరీలు రోజురోజుకీ పెరిగిపోతున్నాయి. దొంగలు పట్ట పగలే వీధుల్లో చైన్ స్నాచింగ్‌లకు పాల్పడుతూ ప్రజల్లో భయాందోళన సృష్టిస్తున్నారు. నగరంలో పోలీసులు గస్తీ పెంచినా, దొంగలు మాత్రం కొత్త కొత్త పద్ధతులతో దోపిడీలు చేస్తున్నారు.

మహిళ కేకలు వేయడంతో..

తాజాగా ఉప్పల్ ప్రాంతంలో మద్యాహ్నం జరిగిన చైన్ స్నాచింగ్ ఘటన స్థానికులను షాక్‌కు గురి చేసింది. సమాచారం ప్రకారం, ఉప్పల్‌లోని సెవెన్ హిల్స్ కాలనీలో ఓ మహిళ రోడ్డు మీద నడుచుకుంటూ వెళ్తుండగా, ఒక దొంగ వెనుక నుంచి వచ్చి ఆమె మెడలో ఉన్న 4 తులాల బంగారు గొలుసు లాక్కోవడానికి ప్రయత్నించాడు. ఒక్కసారిగా ఆ మహిళ కేకలు వేయడంతో అక్కడ ఉన్న స్థానికులు అప్రమత్తమయ్యారు. మహిళ కేకలు విని సమీపంలోని ప్రజలు వెంటనే అక్కడికి పరుగెత్తి, దొంగను వెంటాడి పట్టుకున్నారు. ఆ దొంగను కొట్టి పోలీసులకు అప్పగించారు. ఈ ఘటన వీడియో సోషల్ మీడియాలో వైరల్ అవుతోంది. 

సీసీటీవీ ఫుటేజ్

ఉప్పల్ పరిధిలో మిట్ట మధ్యాహ్నం చైన్ స్నాచింగ్ కలకలం

హైదరాబాద్ –ఉప్పల్ సెవెన్ హిల్స్ కాలనీలో రోడ్డు మీద నడుస్తూ వెళ్తున్న మహిళ మెడలో 4 తులాల గొలుసు లాక్కొని పారిపోవడానికి ప్రయత్నించిన దొంగ

మహిళ కేకలు విని, దొంగను వెంబడించి పట్టుకుని దేహశుద్ధి చేసిన స్థానికులు pic.twitter.com/8jK5n9j3lz

— Telugu Scribe (@TeluguScribe) October 24, 2025

ఈ ఘటనతో ఉప్పల్ ప్రాంతంలో తీవ్ర ఆందోళన నెలకొంది. పగలే రోడ్డు మీద ఇలాంటి దోపిడీ జరగడం ప్రజల్లో భయాందోళనలు పెంచుతోంది. “మధ్యాహ్నం కూడా సురక్షితం కాదు” అంటూ మహిళలు, పెద్దవారు ఆందోళన వ్యక్తం చేస్తున్నారు. స్థానిక పోలీసులు వెంటనే అక్కడికి చేరుకుని దొంగను అరెస్ట్ చేశారు. అతను ఇంతకు ముందు కూడా ఇలాంటి కేసుల్లో ఉన్నాడా అనే దానిపై పోలీసులు దర్యాప్తు చేస్తున్నారు.

ఇటీవల నగరంలో ఇలాంటి ఘటనలు వరుసగా జరుగుతున్నాయి. కొన్ని రోజుల క్రితం మల్లాపూర్, ఎల్‌బీ నగర్ ప్రాంతాల్లో కూడా ఇలాంటి చైన్ స్నాచింగ్ కేసులు నమోదయ్యాయి. ఈ పరిణామాలతో హైద‌రాబాద్ ప్రజలు భయాందోళనలో ఉన్నారు.

ప్రజలు జాగ్రత్తగా ఉండాలని, విలువైన ఆభరణాలు ధరించి బయటకు వెళ్లేటప్పుడు జాగ్రత్తలు తీసుకోవాలని పోలీసులు సూచిస్తున్నారు. అలాగే, ఎవరైనా అనుమానాస్పద వ్యక్తులను గమనిస్తే వెంటనే పోలీసులకు సమాచారం ఇవ్వాలని విజ్ఞప్తి చేశారు.

మొత్తానికి, పగలే దోపిడీలు జరుగుతున్న హైదరాబాద్‌లో భద్రతా పరిస్థితులు ఆందోళన కలిగిస్తున్నాయి. ఇటువంటి నేరాలు మళ్లీ జరగకూడదనే ఆందోళన ప్రజల్లో వ్యక్తమవుతోంది.