Women Harassment : రీల్ లైఫ్‌ హీరోలు..రియల్ లైఫ్‌ విలన్లు.. బయటపడుతున్న సెలెబ్రెటీల భాగోతాలు!

ఇప్పటికే టాలీవుడ్ ప్రముఖ కొరియోగ్రాఫర్ జానీ మాస్టర్ పై లైంగిక వేధింపుల కేసు నమోదవడంతో పాటు విచారణ కూడా జరుగుతోంది. జానీ పై అతని దగ్గర పనిచేసే అసిస్టెంట్ మహిళా కొరియోగ్రాఫర్ లైంగిక వేధింపుల కేసు పెట్టింది. బాధితురాలు మైనర్ గా ఉన్నప్పటి నుంచి జానీ ఆమె పై లైంగిక వేధింపులకు పాల్పడినట్లు తెలిసింది. ప్రస్తుతం జానీ చంచల్‌గూడా జైల్‌ రిమాండ్‌లో ఉన్నారు.

సౌత్ టూ నార్త్ ఎంతో మంది స్టార్ హీరోలకు కొరియోగ్రాఫర్ గా చేయడంతో పాటు.. జాతీయ అవార్డు పొందిన తొలి సౌత్ ఇండియన్ కొరియోగ్రాఫర్ గా ఊహించని పాపులారిటీ సొంతం చేసుకున్న జానీ పై ఇలాంటి ఆరోపణలు రావడం ఆయన ఇమేజ్ ను ఒక్కసారిగా దెబ్బతీసింది.

ఇక ఈ ఘటన మరువక ముందే సామజిక సేవ చేస్తూ యూట్యూబర్ గా మంచి పేరు తెచ్చుకున్న హర్ష సాయి పై కూడా లైంగిక ఆరోపణలు రావడం సంచలనం రేపింది. రూ .2కోట్లు తీసుకొని మోసం చేశాడని, నగ్నంగా ఫోటోలు తీసి అత్యాచారానికి పాల్పడ్డాడని ఓ బాధితురాలు కేసు పెట్టింది.

యూట్యూబ్ ద్వారా తాను సంపాదించిన డబ్బును ఎంతో మంది పేదవారికి కోసం ఖర్చు చేస్తూ దానకర్ణుడిగా పాపులరైన హర్ష పై కూడా ఇలాంటి ఆరోపణలు రావడం అందరికీ ఆశ్చర్యాన్నీ కలిగించింది. ప్రస్తుతం పరారీలో ఉన్న హర్ష కోసం పోలీసులు గాలింపు చర్యలు చేపట్టారు.

ఇవి ఇలా ఉండగానే మరో ప్రముఖ యూట్యూబర్, పాపులర్ ఫోక్ సింగర్ మల్లిక్ తేజపై కేసు పై తాజాగా అత్యాచార కేసు నమోదైంది. మాయమాటలు చెప్పి తనపై లైంగిక దాడికి పాల్పడినట్లు మరో మహిళా ఫోక్ సింగర్ జగిత్యాల పీఎస్ లో కేసు పెట్టింది.

మల్లిక్ బ్లాక్‌ మెయిల్‌ చేసి పలుమార్లు తనపై అత్యాచారానికి పాల్పడినట్లు, ఆమె కుటుంబ సభ్యులను కూడా దుర్భాషలాడినట్లు బాధితురాలు ఫిర్యాదులో తెలిపింది. ఈ మేరకు కేసు మల్లిక్ పై నమోదు చేసిన పోలీసులు విచారణ చేపట్టారు.