Tamannaah: భారీ బయోపిక్‌లో తమన్నా? కొత్త సినిమా వివరాలు లీక్..!

Tamannaah: నటి తమన్నా ఇటీవలఓదెల 2 లో శక్తివంతమైన పాత్రతో, అలాగే అజయ్ దేవగన్ నటించిన రైడ్ 2లో ఆకర్షణీయమైన పాత్రతో ప్రేక్షకులను ఆకట్టుకున్నారు. ప్రస్తుతం ఆమె చేతిలో కొన్ని పెద్ద సినిమాలు ఉండగా, మరో పెద్ద అవకాశం ఆమెకు వచ్చినట్లు సినిమా వర్గాలు చెబుతున్నాయి.

తాజా సమాచారం ప్రకారం, తమన్నా త్వరలో ప్రారంభం కానున్న ప్రముఖ బాలీవుడ్ దర్శకుడు వీ. శాంతారాం జీవిత కథ ఆధారంగా రూపొందుతున్న బయోపిక్‌లో నటించబోతున్నారు. ఈ సినిమాలో ఆమె వీ. శాంతారాం గారి భార్య సంధ్య పాత్రలో కనిపించనున్నట్టు సమాచారం.

సాంధ్య హిందీ, మరాఠీ చిత్రాల్లో ప్రముఖ నటి. ఆమె నటించిన అనేక సినిమాలకు వీ. శాంతారాం దర్శకత్వం వహించారు. ఇద్దరూ కలిసి పనిచేసిన చిత్రాలు అప్పట్లో మంచి గుర్తింపు పొందాయి. అందుకే ఈ పాత్ర సినిమా కథలో ఎంతో ముఖ్యమైందిగా భావిస్తున్నారు.

ఈ బయోపిక్‌కు చిత్రపతి వీ. శాంతారాం అనే పేరు పెట్టారు. వీ. శాంతారాం ప్రధాన పాత్రలో బాలీవుడ్ యువ హీరో సిద్ధాంత్ చతుర్వేది నటించనున్నాడు. ఈ సినిమా ద్వారా ఆయనకు కూడా కొత్త తరహా పాత్ర చేసే అవకాశం లభించనుంది.

ఈ చిత్రాన్ని నాటసామ్రాట్ చిత్రంతో పేరు తెచ్చుకున్న అభిజిత్ దేశ్‌పాండే దర్శకత్వం వహిస్తున్నారు. ఆయన భావోద్వేగాలకు, బలమైన పాత్రలను చూపించడంలో ప్రసిద్ధి. అందువల్ల వీ. శాంతారాం జీవితం ఆధారంగా వచ్చే ఈ చిత్రం కూడా ప్రత్యేకంగా ఉండనుందని అంచనా.

తమన్నా ఈ పాత్రను చేయడానికి ఆసక్తి చూపినట్లు తెలుస్తోంది. కథ విన్న వెంటనే ఆమె ఈ పాత్రను అంగీకరించిందని సమాచారం. ఆమె గత కొన్నేళ్లుగా విభిన్న పాత్రలు చేస్తూ తన నటనకు కొత్త కోణం చూపిస్తున్న విషయం తెలిసిందే. ఈ బయోపిక్ ఆమె కెరీర్‌లో మరో మంచి విజయం అవుతుందని భావిస్తున్నారు.

సినిమా త్వరలోనే షూటింగ్ ప్రారంభించేందుకు ఏర్పాట్లు జరుగుతున్నాయి. వీ. శాంతారాం జీవితం, ఆయన చేసిన ప్రయోగాలు, భారతీయ సినిమాకు చేసిన సేవలను చూపించడానికి చిత్రబృందం కృషి చేస్తోంది.

ఈ చిత్రం విడుదలైన తర్వాత బాలీవుడ్‌లో మరో మంచి బయోపిక్‌గా నిలుస్తుందని పరిశ్రమలో పెద్ద చర్చ నడుస్తోంది. అభిమానులు కూడా తమన్నా కొత్త పాత్రలో ఎలా కనిపిస్తుందో ఆసక్తిగా ఎదురు చూస్తున్నారు.