Jana Nayagan Trailer: యో చూసుకోబడ్లా..! విజయ్ ‘జన నాయగన్’ ట్రైలర్ లో ఈ మిస్టేక్ గమనించారా..?

Jana Nayagan Trailer: తమిళ స్టార్ హీరో దళపతి విజయ్(Vijay Thalapathy) నటిస్తున్న చివరి సినిమా ‘జన నాయగన్’ పై అభిమానులతో పాటు సాధారణ ప్రేక్షకుల్లో కూడా భారీ అంచనాలు ఉన్నాయి. ఇప్పటికే విడుదలైన ట్రైలర్ మంచి హైప్‌ను క్రియేట్ చేసినప్పటికీ, అదే ట్రైలర్ ఇప్పుడు ఒక వివాదానికి కారణమైంది. ట్రైలర్‌లో ఒక చిన్న తప్పు కనిపించడంతో సోషల్ మీడియాలో చిత్ర యూనిట్‌పై ట్రోలింగ్ మొదలైంది.

ట్రైలర్‌లో 00:23 సెకన్ల దగ్గర వచ్చే ఒక సీన్‌లో, చేతిలో గన్ పట్టుకుని ఉన్న వ్యక్తి కనిపిస్తాడు. అయితే ఆ సీన్ కింద భాగంలో Gemini AI అనే లోగో స్పష్టంగా కనిపించింది. ఇది గమనించిన నెటిజన్లు వెంటనే దీనిపై కామెంట్లు చేయడం మొదలుపెట్టారు. ఇంత పెద్ద హీరో, భారీ బడ్జెట్ సినిమా అయినా కూడా ఇలాంటి చిన్న తప్పు ఎలా జరిగింది అంటూ ప్రశ్నిస్తున్నారు.

కొంతమంది విజయ్ అభిమానులు మాత్రం దీనిని పెద్ద విషయం కాదని, టెక్నాలజీ వాడటం తప్పు కాదని సినిమా యూనిట్‌కు మద్దతుగా నిలుస్తున్నారు. కానీ ఎక్కువ మంది ప్రేక్షకులు మాత్రం, ఒక చిన్న సీన్ కోసం కూడా AI మీద ఆధారపడటం, పైగా లోగో తీసేయకుండా ట్రైలర్ రిలీజ్ చేయడం నిర్లక్ష్యంగా ఉందని విమర్శిస్తున్నారు. ముఖ్యంగా పోస్ట్ ప్రొడక్షన్ సమయంలో క్వాలిటీ చెక్ సరిగ్గా జరగలేదని అంటున్నారు.

ఈ వివాదంపై సినిమా మేకర్స్ ఎలా స్పందిస్తారో చూడాలి. ట్రైలర్‌ను అప్‌డేట్ చేసి లోగో తీసేస్తారా? లేక దీనిపై అధికారికంగా క్లారిటీ ఇస్తారా? అనే విషయాలు ఆసక్తిగా మారాయి.

‘జన నాయగన్’ సినిమాకు హెచ్. వినోద్ దర్శకత్వం వహిస్తున్నారు. ఈ సినిమా బాలకృష్ణ నటించిన తెలుగు హిట్ మూవీ ‘భగవంత్ కేసరి’కి రీమేక్. అయితే విజయ్ ఇమేజ్‌కు తగ్గట్టు కొన్ని మార్పులు చేశారని సమాచారం. రాజకీయ నేపథ్యం ఉండేలా కథను కొంచెం మార్చినట్టు టాక్.

ఈ సినిమాలో పూజా హెగ్డే హీరోయిన్‌గా నటిస్తుండగా, మమితా బైజు కీలక పాత్రలో కనిపించనుంది. అలాగే బాబీ డియోల్, గౌతమ్ వాసుదేవ్ మీనన్, ప్రకాష్ రాజ్, ప్రియమణి, నరైన్ తదితరులు ముఖ్యమైన పాత్రల్లో నటిస్తున్నారు. సంగీతాన్ని యువ సంగీత దర్శకుడు అనిరుధ్ రవిచందర్ అందిస్తున్నారు.

ట్రైలర్ మొత్తంగా చూస్తే విజయ్ స్టైల్ ఎలివేషన్స్, డైలాగ్స్ అభిమానులను బాగా ఆకట్టుకున్నాయి. “పంబరెగ్గొట్టేవాడి గురించి వినుంటావ్… అందులో రికార్డు ఉన్న వాడి పేరు విన్నావా” అనే డైలాగ్ ప్రత్యేకంగా హైలైట్ అయ్యింది.

KVN ప్రొడక్షన్స్ బ్యానర్‌పై రూపొందుతున్న ఈ సినిమా 2026 జనవరి 9న తమిళం, తెలుగు, హిందీ భాషల్లో థియేటర్లలో విడుదల కానుంది. వివాదాలు ఎలా ఉన్నా, విజయ్ చివరి సినిమా కావడంతో ‘జన నాయగన్’పై ఆసక్తి మాత్రం తగ్గేలా లేదు.