Mowgli 2025: 'అఖండ 2' దెబ్బ.. రోషన్ కనకాల 'మోగ్లీ' తట్టుకుంటుందా?

Mowgli 2025: బాలకృష్ణ(Balakrishna) నటించిన అఖండ 2(Akhanda 2) రేపు గ్రాండ్‌గా విడుదల కానుండటంతో అన్ని ప్రాంతాల్లో భారీ హైప్ నెలకొంది. ఈ భారీ సినిమా మొదట డిసెంబర్ 5న రావాల్సి ఉండగా, ఆర్థిక సమస్యల కారణంగా డిసెంబర్ 12కు వాయిదా పడింది. విడుదల తేదీపై క్లారిటీ లేని నేపథ్యంలో, అదే రోజు రావాల్సిన యువ హీరో రోషన్ కనకాల సినిమా మోగ్లీ 2025 మాత్రం ఒకరోజు వెనక్కు వెళ్లాల్సి వచ్చింది. ఇప్పుడు ఈ చిత్రం డిసెంబర్ 13న విడుదల కానుంది, అయితే డిసెంబర్ 12 నుంచే ప్రీమియర్లు ప్రారంభం అవుతాయి.

అఖండ 2 దెబ్బతో మోగ్లీకే పెద్ద సవాలు

అఖండ 2 చుట్టూ భారీ అంచనాలు ఉండటంతో ప్రస్తుతం మొత్తం దృష్టి ఆ సినిమాపై ఉంది. అందుకే చిన్న సినిమా అయిన మోగ్లీ 2025కి ప్రేక్షకులను థియేటర్లకు రప్పించడం కష్టంగా మారింది. బాక్సాఫీస్ వద్ద నిలబడాలంటే మోగ్లీకి పాజిటివ్ టాక్ చాలా అవసరం.

సందీప్ రాజ్ దర్శకత్వంలో రూపొందుతున్న ఈ చిత్రాన్ని పీపుల్ మీడియా ఫ్యాక్టరీ బ్యానర్ పై టీజీ విశ్వ ప్రసాద్, కృతి ప్రసాద్ నిర్మించారు. ఇప్పటికే వచ్చిన టీజర్, పాటలు, ముఖ్యంగా ఎమోషన్స్ లోతైన కథను చూపించిన ట్రైలర్ మంచి రెస్పాన్స్ పొందాయి. ట్రైలర్ చూసిన ప్రేక్షకులు కథపై భారీ ఆసక్తి చూపుతున్నారు.

రిలీజ్ పోస్టర్‌లో రోషన్ కనకాల, సాక్షి మడోల్కర్ సంతోషంగా కనిపించగా, బండి సరోజ్ కుమార్ మాత్రం సీరియస్ లుక్‌లో కనిపించారు. ఈ కథ ప్రధానంగా ఈ ముగ్గురు పాత్రలను చుట్టూ తిరుగుతుందని తెలుస్తోంది. వీరిని ఆధునిక రామాయణంలోని రామ-సీత-రవణుల లాగా చూపించినట్లు తెలుస్తోంది. ఈ పాత్ర కోసం రోషన్ పూర్తి కొత్త లుక్‌లో కనిపించబోతున్నారు.

సినిమా ప్రేమకథతో పాటు ఉత్కంఠమైన యాక్షన్ అంశాలను కలిగి ఉండటం ప్రత్యేకత. హర్ష చెముడు ఒక ముఖ్యమైన పాత్రలో కనిపించనున్నాడు. సినిమాకు కాల భైరవ సంగీతం అందించగా, రామ మారుతి ఎం సినిమాటోగ్రఫీ, పవన్ కళ్యాణ్ కోదాటి ఎడిటింగ్ బాధ్యతలు నిర్వహించారు.

అఖండ 2 భారీగా దూసుకెళ్లబోతుండటంతో, మోగ్లీ 2025 థియేటర్లలో నిలబడాలంటే కథ, ఎమోషన్స్, మౌత్ టాక్ (word of mouth) బలంగా పనిచేయాలి. ఇప్పుడు ప్రేక్షకులు డిసెంబర్ 12 ప్రీమియర్ల కోసం, అలాగే  డిసెంబర్ 13 విడుదల కోసం ఎంతో ఆసక్తిగా ఎదురు చూస్తున్నారు.

మోగ్లీ కంటెంట్ క్లిక్ అయితే, అఖండ 2 వంటి బిగ్ మూవీ పోటీకి ఉన్నాసరే తనదైన స్థానం సంపాదించే అవకాశం ఉంది.