Mega Green Ammonia Plant: దేశంలో తొలి భారీ గ్రీన్ అమోనియా ప్లాంట్‌కు ఏపీ ప్రభుత్వం శ్రీకారం

Mega Green Ammonia Plant: ఆంధ్రప్రదేశ్(Andhra Pradesh) రాష్ట్రం క్లీన్ ఎనర్జీ రంగంలో మరో కీలక అడుగు వేస్తోంది. ఏపీ ఇంటిగ్రేటెడ్ క్లీన్ ఎనర్జీ పాలసీ-2024లో భాగంగా కాకినాడలో దేశంలోనే తొలి భారీ గ్రీన్ అమోనియా ప్లాంట్‌కు శ్రీకారం చుట్టనున్నారు. ఈ ప్రాజెక్ట్‌కు ముఖ్యమంత్రి చంద్రబాబు నాయుడు శంకుస్థాపన చేయనున్నారు. ఈ కార్యక్రమంలో ఉప ముఖ్యమంత్రి పవన్ కళ్యాణ్ కూడా పాల్గొననున్నారు.

ఈ పర్యావరణ హిత ప్రాజెక్ట్‌ను గ్రీన్‌కో గ్రూప్‌కు చెందిన ఏఎం గ్రీన్ సంస్థ అభివృద్ధి చేస్తోంది. గత ఏడాది జనవరిలోనే ఈ ప్రాజెక్ట్‌కు రాష్ట్ర ప్రభుత్వం అనుమతులు ఇచ్చింది. మొత్తం రూ.13,000 కోట్ల పెట్టుబడితో ఈ ప్లాంట్ నిర్మించనున్నారు. ఇది ఏటా 15 లక్షల మెట్రిక్ టన్నుల గ్రీన్ అమోనియాను ఉత్పత్తి చేసే సామర్థ్యం కలిగి ఉంటుంది.

గ్రీన్ అమోనియా తయారీ విధానం సాధారణ అమోనియాతో పోలిస్తే పూర్తిగా భిన్నం. బొగ్గు, చమురు, గ్యాస్ ఉపయోగించే గ్రే లేదా బ్లూ అమోనియాలా కాకుండా, గ్రీన్ అమోనియా పూర్తిగా పునరుత్పాదక ఇంధనంతో తయారవుతుంది. దీనివల్ల కార్బన్ ఉద్గారాలు ఉండవు. ప్రపంచ దేశాలు నెట్ జీరో లక్ష్యాల వైపు అడుగులు వేస్తున్న సమయంలో గ్రీన్ హైడ్రోజన్, గ్రీన్ అమోనియా భవిష్యత్ ఇంధనాలుగా మారుతున్నాయి. ఈ నేపథ్యంలో కాకినాడ ప్రాజెక్ట్ భారత్‌ను గ్లోబల్ క్లీన్ ఎనర్జీ మ్యాప్‌లో నిలబెట్టనుంది.

ఈ ప్రాజెక్ట్‌లో భాగంగా నాగార్జున ఫర్టిలైజర్స్ అండ్ కెమికల్స్ లిమిటెడ్‌కు చెందిన పాత గ్రే అమోనియా ప్లాంట్‌ను గ్రీన్ అమోనియా యూనిట్‌గా మార్చనున్నారు. దాదాపు 495 ఎకరాల విస్తీర్ణంలో ఆధునిక సాంకేతికతతో ఈ ప్లాంట్‌ను అభివృద్ధి చేయనున్నారు. దీని ద్వారా సుమారు 2,600 మంది యువతకు ఉద్యోగ అవకాశాలు కలగనున్నాయి. 2027 చివరి నాటికి ఉత్పత్తి ప్రారంభం కానుంది.

కాకినాడ పోర్ట్‌కు సమీపంలో ఉండటంతో ఈ ప్లాంట్ నుంచి ఎగుమతులకు మంచి అవకాశాలు ఉన్నాయి. ఇప్పటికే జర్మనీకి చెందిన యూనిపర్ సంస్థతో ఏఎం గ్రీన్ ఒప్పందం కుదుర్చుకుంది. 2028 నుంచి ఏటా 1.25 లక్షల టన్నుల గ్రీన్ అమోనియాను జర్మనీకి ఎగుమతి చేయనున్నారు. ఇది భారతదేశంలో తయారయ్యే శుభ్రమైన ఇంధనానికి ఉన్న అంతర్జాతీయ డిమాండ్‌ను చూపిస్తోంది.

ఈ ప్రాజెక్ట్‌కు మలేషియాకు చెందిన పెట్రోనాస్, సింగపూర్‌కు చెందిన జీఐసీ, యూఏఈకి చెందిన అబుదాబి ఇన్వెస్ట్‌మెంట్ అథారిటీ వంటి అంతర్జాతీయ సంస్థలు మద్దతు ఇస్తున్నాయి.

ఇదే కాకుండా కాకినాడలోనే రూ.2,000 కోట్ల పెట్టుబడితో 2 గిగావాట్ ఎలక్ట్రోలైజర్ తయారీ యూనిట్‌ను కూడా ఏఎం గ్రీన్ ఏర్పాటు చేస్తోంది. ఈ అన్ని చర్యలతో ఆంధ్రప్రదేశ్ శుభ్రమైన ఇంధన కేంద్రంగా మారే దిశగా ముందుకు సాగుతోంది.