Hot Air Balloon Festival: హైదరాబాద్‌లో తొలిసారిగా హాట్ ఎయిర్ బెలూన్ ఫెస్టివల్‌.. మీరు వెళ్తున్నారా..?

Hot Air Balloon Festival: తెలంగాణ రాష్ట్రం తన పర్యాటక రంగానికి మరో కొత్త ఆకర్షణను జోడించింది. హైదరాబాద్‌లో తొలిసారిగా హాట్ ఎయిర్ బెలూన్ ఫెస్టివల్‌ను నిర్వహించింది. మూడు రోజుల పాటు సికింద్రాబాద్ పరేడ్ గ్రౌండ్స్‌లో జరుగుతున్న ఈ వేడుకకు ప్రజల నుంచి మంచి స్పందన వస్తోంది. ఈ కార్యక్రమాన్ని మంత్రి జూపల్లి కృష్ణారావు ప్రారంభించారు. ఇది హైదరాబాద్ పర్యాటక, సాంస్కృతిక ప్రయాణంలో ఒక కొత్త అధ్యాయంగా నిలుస్తోంది.

ఈ ఫెస్టివల్‌లో ముందుగా టిక్కెట్లు బుక్ చేసుకున్న సుమారు 300 మంది సందర్శకులకు హాట్ ఎయిర్ బెలూన్ రైడ్ అవకాశం కల్పించారు. ఈ రైడ్ ద్వారా నగరాన్ని ఎత్తునుండి చూడవచ్చు. ఇది చాలా అరుదైన అనుభూతి కావడంతో ప్రధాన ఆకర్షణగా మారింది.

Telangana Hot Air Baloon Festival

🎈✨ Hot Air Balloon Festival takes off near Golconda Fort, Hyderabad ✨🎈 pic.twitter.com/HjPs7n9CWb

— Jacob Ross (@JacobBhoompag) January 16, 2026

అయితే సాధారణ ప్రజల కోసం ప్రత్యేకంగా నైట్ గ్లో షోను ఏర్పాటు చేశారు. ఈ షోలో బెలూన్‌లను నేలకే కట్టి ఉంచి, రంగుల లైట్లు, సంగీతంతో అద్భుతంగా అలంకరించారు. కుటుంబాలతో వచ్చే వారు, ఫోటోలు తీయాలనుకునే వారికి ఇది ప్రత్యేక ఆకర్షణగా నిలుస్తోంది.

హాట్ ఎయిర్ బెలూన్ ఫెస్టివల్ టిక్కెట్లు ఆన్‌లైన్‌లో అందుబాటులో ఉన్నాయి. పిల్లలు, పెద్దలు ఎంచుకునే రైడ్ ఆధారంగా టిక్కెట్ ధరలు రూ.500 నుంచి రూ.1500 వరకు ఉన్నాయి. ఎక్కువ మంది ప్రజలు ఈ వేడుకను ఆస్వాదించేందుకు వీలుగా ధరలను అందుబాటులో ఉంచినట్లు నిర్వాహకులు తెలిపారు.

సంక్రాంతి పండుగ సమయంలో తెలంగాణ ప్రభుత్వం పలు పర్యాటక కార్యక్రమాలను విజయవంతంగా నిర్వహించింది. జనవరి 13 నుంచి 15 వరకు జరిగిన ఇంటర్నేషనల్ కైట్ అండ్ స్వీట్స్ ఫెస్టివల్‌కు భారీగా జనం హాజరయ్యారు. ఆ తర్వాత జనవరి 16, 17 తేదీల్లో గచ్చిబౌలి స్టేడియంలో డ్రోన్ ఫెస్టివల్ నిర్వహించారు.

ఇప్పుడు జనవరి 16 నుంచి 18 వరకు జరుగుతున్న హాట్ ఎయిర్ బెలూన్ ఫెస్టివల్ హైదరాబాద్ చరిత్రలో తొలిసారి నిర్వహించడం విశేషం. ప్రతి రోజు సాయంత్రం 4 గంటల తర్వాత రంగురంగుల బెలూన్‌లను చూసే అవకాశం ఉంటుంది. నగర మధ్యలోనే ఓపెన్ ఎయిర్ వాతావరణంలో ఈ అనుభూతిని ఆస్వాదించవచ్చు.

హాట్ ఎయిర్ బెలూన్లు, డ్రోన్ షోలు, అంతర్జాతీయ స్థాయి వేడుకలతో తెలంగాణ ప్రభుత్వం హైదరాబాద్‌ను పర్యాటక కేంద్రంగా మరింతగా అభివృద్ధి చేస్తోంది. ఈ హాట్ ఎయిర్ బెలూన్ ఫెస్టివల్ నగరానికి కొత్త గుర్తింపును తీసుకువచ్చిందని చెప్పవచ్చు.