Google Gemini New Feature: గూగుల్ జెమినీలో ఫోటో సరిగ్గా రావడం లేదా..? ఈ కొత్త ఫీచర్ మీకోసమే!

Google Gemini New Feature: గూగుల్ జెమినీ (Google Gemini) లో నచ్చినట్టుగా క్వాలిటీ ఫోటోలను తయారు చేయడం ఇప్పటికే చాలా మందికి ఈజీ అయిపోయింది. అయితే ఆ ఫోటోలను మార్చడం లేదా చిన్న మార్పులు చేయడం ఇప్పటివరకు కొంచెం కష్టంగానే ఉండేది. ప్రస్తుతం ఒక ఫోటోను ఎడిట్ చేయాలంటే ముందు దాన్ని డౌన్‌లోడ్ చేసి, తరువాత మళ్లీ అప్‌లోడ్ చేసి మార్కప్ టూల్స్ ఉపయోగించాల్సి వచ్చేది.

ఇప్పుడు ఈ ప్రాసెస్ ను మరింత ఈజీగా చేయడానికి గూగుల్ కొత్త ఫీచర్‌పై పని చేస్తోంది. తాజాగా వచ్చిన సమాచారం ప్రకారం, జెమినీ రూపొందించిన ఇమేజ్ పై నేరుగా ఒక పెన్సిల్ ఐకాన్ కనిపించేలా కొత్త మార్పు తీసుకురానుంది. ఈ ఐకాన్‌పై ట్యాప్ చేస్తే వెంటనే మార్కప్ టూల్స్ ఓపెన్ అవుతాయి.

ఈ టూల్స్ ద్వారా ఫోటో లోని ఏ భాగాన్ని మార్చాలనుకుంటున్నారో గుర్తించవచ్చు. ఉదాహరణకు, మీరు మార్చాలనుకున్న ఏరియా వరకు సర్కిల్ వేసి గుర్తించవచ్చు. తర్వాత “Done” పై క్లిక్ చేసి, ఆ భాగంలో ఏ మార్పు కావాలో టెక్స్ట్ రూపంలో రాయవచ్చు.

ఇంకా ఒక ఆసక్తికరమైన విషయం ఏమిటంటే, వినియోగదారులు ఇమేజ్ పై నేరుగా టెక్స్ట్ కూడా రాయగలరు. అంటే కేవలం కావాల్సిన భాగాన్ని సర్కిల్ వేసి చూపించడం మాత్రమే కాదు, ఫోటోలోనే వివరణ రాసి ఏ మార్పు కావాలో చెప్పవచ్చు. ఇది ముఖ్యంగా ఒకే ఫోటో లో అనేక మార్పులు చేయాలనుకునే వారికి ఉపయోగపడుతుంది.

ఈ కొత్త ఫీచర్ ప్రస్తుతం Google app version 17.8.59 (beta)లో ఉంది. అయితే దీన్ని సాధారణంగా అందరికీ ఇంకా అందుబాటులోకి తీసుకురాలేదు. కొంతమంది మాత్రమే ప్రత్యేకంగా ఎనేబుల్ చేసి దీనిని పరీక్షించారు. అందుకే ఈ వెర్షన్ ఉన్నప్పటికీ చాలా మందికి ఈ ఫీచర్ ఇంకా కనిపించకపోవచ్చు.

గత సంవత్సరం నవంబర్‌లో TestingCatalog అనే లీకర్ ఈ టూల్‌కు సంబంధించిన ఒక స్టార్టింగ్ వెబ్ వెర్షన్‌ను గుర్తించాడు. అయితే ఇప్పటివరకు జెమినీ వెబ్ వెర్షన్‌లో కూడా ఇది పూర్తిగా అందుబాటులోకి రాలేదు.

సాధారణంగా జెమినీకి సంబంధించిన కొత్త ఫీచర్లు ముందుగా వెబ్ వెర్షన్‌లో వచ్చి తరువాత మొబైల్ యాప్‌లో వస్తాయి. కానీ ఈసారి మొబైల్ యాప్‌లో ముందుగా పరీక్షిస్తున్నట్లు కనిపిస్తోంది. అందువల్ల ఈ ఫీచర్ అందరికీ అందుబాటులోకి రావడానికి ఇంకా కొన్ని వారాలు లేదా నెలలు పట్టే అవకాశం ఉంది.

జెమినీ మొదట్లోనే Nano Banana అనే శక్తివంతమైన ఇమేజ్ జనరేషన్ మోడల్‌తో ప్రపంచవ్యాప్తంగా మంచి గుర్తింపు పొందింది. ప్రస్తుతం ఇది మరింత మెరుగైన Nano Banana 2 (Gemini 3.1 Flash Image) మోడల్‌ను అందిస్తోంది. దీని వల్ల ఫోటోలను వేగంగా, మంచి క్వాలిటీతో తయారుచేయొచ్చు.

ఇలాంటి కొత్త ఫీచర్లు రావడం వల్ల జెమినీ ద్వారా రూపొందించిన ఫోటోలను వెంటనే మార్చడం, మెరుగుపరచడం చాలా సులభం అవుతుంది. దీంతో భవిష్యత్తులో ఇమేజ్ ఎడిటింగ్ ప్రక్రియ మరింత వేగంగా, సౌకర్యంగా మారే అవకాశం ఉంది.