Golden Gifts: గోల్డ్ గిఫ్ట్ గా ఇస్తున్న కంపెనీ..! వెంటనే జాయిన్ అయిపోండి.. ఎక్కడంటే..?

Golden Gifts: ఉద్యోగులను ప్రోత్సహించే కొత్త మార్గాలను అన్వేషించడంలో చాలా కంపెనీలు ముందుంటాయి. కానీ చైనాలోని ప్రముఖ టెక్నాలజీ సంస్థ ఇన్‌స్టా360 మాత్రం ఈ విషయంలో నెక్స్ట్ లెవెల్ అనే చెప్పాలి. ఈ కంపెనీ తమ ప్రతిభావంతమైన ఉద్యోగులకు బహుమతిగా బంగారు కీబోర్డ్ కీలు అందించి అందరినీ ఆశ్చర్యపరిచింది. ప్రతి సంవత్సరం అక్టోబర్ 24న ‘ప్రోగ్రామర్ డే’గా జరుపుకునే ఈ కంపెనీ, ఆ రోజున తమ సిబ్బంది కృషికి గుర్తింపుగా ఈ ప్రత్యేక బహుమతులు ఇస్తుంది. ఈసారి మొత్తం 21 మంది ఉద్యోగులు బంగారంతో తయారైన కీబోర్డ్ కీలు అందుకున్నారు. ఇప్పటికే నాలుగేళ్లుగా ఇన్‌స్టా360 ఈ సంప్రదాయాన్ని కొనసాగిస్తోంది.

బంగారు బహుమతులు ఇస్తున్న చైనా కంపెనీ (China Company Gold Gifts)

ఈ బహుమతుల్లో ముఖ్యంగా స్పేస్ బార్ కీ అత్యంత విలువైనదిగా ఉంది. దాని బరువు సుమారు 35 గ్రాములు, విలువ దాదాపు ₹38 లక్షలు. మిగతా కీలు 10 నుంచి 25 గ్రాముల మధ్య బరువుతో ఉంటాయి. ఇవన్నీ 99.9% స్వచ్ఛమైన బంగారంతో తయారు చేసినవే. కంపెనీ వ్యవస్థాపకుడు లియూ జింగ్‌కాంగ్ మాట్లాడుతూ, “ఈ బంగారు కీలు కేవలం బహుమతులు కాదు. ఇవి మా ఉద్యోగుల ప్రతిభకు ప్రతీక. ప్రతి ప్రోగ్రామర్ కీబోర్డ్‌పై చేసే టచ్ బంగారం లాంటిదే. అందుకే ఈ బహుమతులు ఇవ్వడం మా గౌరవ సూచకం,” అని తెలిపారు.

ఇన్‌స్టా360 తమ ఉద్యోగులను తరచూ వివిధ రకాలుగా ప్రోత్సహిస్తుంది. ఉద్యోగి వివాహం జరిగినప్పుడు లేదా పిల్లలు పుట్టినప్పుడు 1 గ్రాము బంగారు నాణెం బహుమతిగా ఇస్తారు. అలాగే సంవత్సరాంతంలో అత్యుత్తమంగా పనిచేసిన వారికి 50 గ్రాముల బంగారం కూడా అందజేస్తారు. సాధారణంగా చాలా కంపెనీలు జీతం పెంపు, బోనస్ లేదా టూర్ ప్యాకేజీలు ఇస్తుంటాయి. కానీ ఇన్‌స్టా360 మాత్రం బంగారం ద్వారా ఉద్యోగుల కృషికి విలువ ఇస్తుంది. దీనివల్ల సిబ్బందిలో ఆనందం, విశ్వాసం, సృజనాత్మకత పెరుగుతుందని కంపెనీ భావిస్తోంది.

ఇదే సమయంలో, బంగారు కీబోర్డ్ ఫోటోలు సోషల్ మీడియాలో వైరల్ అయ్యాయి. వాటిని చూసిన నెటిజన్లు “ఇలాంటి బాస్ మాకు దొరకాలి”, “మా కంపెనీ కూడా ఇలాగే బహుమతులు ఇస్తే బాగుంటుంది” అంటూ కామెంట్లు చేస్తున్నారు. కొందరు దీన్ని పబ్లిసిటీ స్టంట్ అంటున్నారు, మరికొందరు ఉద్యోగుల పట్ల గౌరవ సూచక చర్యగా ప్రశంసిస్తున్నారు. మొత్తం మీద, ఇన్‌స్టా360 ఇచ్చిన ఈ బంగారు బహుమతులు ఉద్యోగుల మనసులు గెలుచుకోవడమే కాకుండా, ఇతర కంపెనీలకు కూడా ప్రేరణగా నిలుస్తున్నాయి.