Elon Musk : ప్రపంచ కుబేరుడు ఎలోన్ మస్క్ కిందకు జారిపోతున్నాడా? 

Billionaires Elon Musk : ప్రపంచంలోని అత్యంత ధనవంతుడు ఎలోన్ మస్క్..  అతని ఫ్లాగ్‌షిప్ కంపెనీ టెస్లా(Tesla) గత నెల రోజులుగా తమ సంపదలో భారీగా నష్టపోయారు. ఒకవైపు కంపెనీ వాల్యుయేషన్ 210 బిలియన్ డాలర్లకు పైగా తగ్గింది. మరోవైపు, ఎలోన్ మస్క్ నికర విలువ 200 బిలియన్ డాలర్ల దిగువకు పడిపోయింది. ఇప్పుడు ప్రపంచంలోనే అత్యంత ధనవంతుడిగా ఉన్న మస్క్  స్థానానికి కూడా ముప్పు పొంచి ఉంది. జనవరి 25 గురించి చూసినట్లయితే, ఆ ఒక్కరోజే  టెస్లా షేర్లలో 12 శాతానికి పైగా క్షీణత ఉంది. దీని కారణంగా మస్క్ సంపద 18 బిలియన్ డాలర్లకు పైగా తగ్గిపోయింది.  మస్క్ సంపద ఎందుకు పడిపోయిందో ఇప్పుడు తెలుసుకుందాం. 

మస్క్ ప్రకటన

ప్రస్తుత సంవత్సరంలో టెస్లా అమ్మకాల వృద్ధి మరింత తగ్గొచ్చని ఇటీవల ఎలోన్ మస్క్(Elon Musk) ఆందోళన వ్యక్తం చేశారు. ఇక్కడ చెప్పుకోవలసిన విషయం ఏమిటంటే, టెస్లా ధరలు తగ్గించిన తరువాత కూడా అమ్మకాల తగ్గుదల వస్తుందని చెప్పడం. నిజానికి ఇప్పుడు టెస్లా కు  డిమాండ్ చాలా తక్కువగా ఉంది. దీంతో పాటు చైనీస్ EV తయారీదారుల నుండి విపరీతమైన పోటీ ఉంది. దీంతో ఆ టెస్లా అమ్మకాలు తగ్గొచ్చని మస్క్ అంటున్నారు. అంతేకాకుండా, దీనికి ముందు కూడా, కంపెనీ మార్జిన్ నిరంతరం తగ్గుతోందని ఎలోన్ మస్క్ తెలియజేశారు. ఈ హెచ్చరిక తర్వాత, కంపెనీ షేర్లు పడిపోయాయి. దీంతో మస్క్ సంపద కూడా తగ్గిపోయింది. 

12 శాతానికి పైగా పడిపోయిన షేర్లు..

ఎలాన్ మస్క్ ప్రకటన తర్వాత కంపెనీ షేర్లలో 12.13 శాతం క్షీణత కనిపించింది. ఆ తర్వాత కంపెనీ షేర్లు 182.63 డాలర్లకు పడిపోయాయి. అయితే, గత నెలలో కంపెనీ షేర్లు మొత్తంగా చూసుకుంటే, దాదాపు 29 శాతం క్షీణించాయి. ఒక నెల క్రితం కంపెనీ షేర్ ధర $250 కంటే ఎక్కువ. ఈ కాలంలో కంపెనీ షేర్లు 74 డాలర్లు క్షీణించాయి. నిపుణుల అంచనాలు నిజమైతే, రాబోయే రోజుల్లో టెస్లా షేర్లు మరింత పడిపోయే అవకాశం ఉంది. 

కంపెనీ వాల్యుయేషన్ కూడా పడిపోతోంది..

మరోవైపు కంపెనీ వాల్యుయేషన్‌(Company Valuation) లో కూడా గణనీయమైన తగ్గుదల చోటు చేసుకుంది. జనవరి 25న షేర్ల పతనం కారణంగా కంపెనీ వాల్యుయేషన్ 80 బిలియన్ డాలర్లు అంటే 6.65 లక్షల కోట్లు తగ్గింది. ప్రస్తుతం కంపెనీ వాల్యుయేషన్ 572.27 బిలియన్ డాలర్లకు చేరుకుంది. గత నెల రోజులుగా కంపెనీ వాల్యుయేషన్‌లో 210 బిలియన్ డాలర్లు అంటే రూ.17.45 లక్షల కోట్లు తగ్గుదల కనిపించింది.  ఒక నెల క్రితం కంపెనీ మార్కెట్ క్యాప్ $782 బిలియన్ కంటే ఎక్కువగా ఉంది.

Also Read: ఒక్కసారి మూడులక్షలు పెడితే చాలు.. నెలకు 31 వేల రూపాయల పెన్షన్.. 

మస్క్ సంపద తగ్గింది..

మరోవైపు, ఎలోన్ మస్క్(Elon Musk) సంపదలో గణనీయమైన తగ్గుదల ఉంది. బ్లూమ్‌బెర్గ్ బిలియనీర్స్ డేటా ప్రకారం, జనవరి 25 పతనం కారణంగా, ఎలోన్ మస్క్ సంపద 18 బిలియన్ డాలర్లు అంటే రూ. 1.50 లక్షల కోట్లు తగ్గింది. ఆ తర్వాత అతని మొత్తం సంపద 200 బిలియన్ డాలర్ల దిగువకు చేరుకుంది. ఎలోన్ మస్క్ సంపద చివరిసారిగా జూన్ 2023లో $200 బిలియన్ల కంటే తక్కువగా కనిపించింది. విశేషమేమిటంటే ప్రస్తుత సంవత్సరంలోనే మస్క్ సంపదలో దాదాపు 31 బిలియన్ డాలర్లు అంటే 2.56 లక్షల కోట్ల మేర క్షీణత నమోదైంది. గత నెలలో 40 బిలియన్ డాలర్లు అంటే రూ.3.32 లక్షల కోట్లు తగ్గింది. 

ప్రమాదంలో నంబర్ 1..

సంపద క్షీణించిన తర్వాత, టెస్లా యజమాని ఎలోన్ మస్క్(Elon Musk) నంబర్ వన్ స్థానం ప్రమాదంలో పడింది. ప్రస్తుతం, మస్క్ నికర విలువ 198 బిలియన్ డాలర్లకు చేరుకుంది. మరోవైపు, అమెజాన్ యజమాని జెఫ్ బెజోస్ అతనికి ఎంతో దూరంలో లేదు. జెఫ్ బెజోస్ మొత్తం సంపద 183 బిలియన్ డాలర్లు. అంటే ఇద్దరి సంపదలో 15 బిలియన్ డాలర్ల వ్యత్యాసం ఉంది. ఇది ఏ రోజునైనా పెరగవచ్చు.  జెఫ్ బెజోస్(Jeff Bezos) మరోసారి ప్రపంచంలోని నంబర్ వన్ ధనవంతుడైన వ్యాపారవేత్తగా అవతరించవచ్చు. ఈ ఏడాది జెఫ్ బెజోస్ సంపద 5.84 బిలియన్ డాలర్లు పెరిగింది.

Watch this interesting Video: