Rajamouli Issue: రాజమౌళిని ఉరికించి కొడతాం: బీజేపీ నేత చీకోటి ప్రవీణ్‌

Rajamouli Issue: దర్శకుడు ఎస్‌.ఎస్‌.రాజమౌళి తన కొత్త సినిమా వారణాసి టైటిల్ గ్లింప్స్ ఈవెంట్‌లో చేసిన కొన్ని వ్యాఖ్యలు పెద్ద వివాదానికి దారితీశాయి. ఈ కార్యక్రమంలో టెక్నికల్ సమస్యలు రావడంతో రాజమౌళి తండ్రి విజయేంద్ర ప్రసాద్ హనుమంతుడిని తలచుకోవాలని సూచించగా, రాజమౌళి “ఏంటి, హనుమంతుడు ఇదేనా చేసేది?” అని చెప్పడం, అలాగే “నేను దేవుళ్లను నమ్మను” అన్న మాటలు సోషల్ మీడియాలో వైరల్ అయ్యాయి.

ఈ వ్యాఖ్యలు హిందూ సంస్థల కోపానికి గురయ్యాయి. హిందూ భావాలను దెబ్బతీశారని రాష్ట్రీయ వానరసేనతో పాటు మరికొన్ని సంఘాలు రాజమౌళిపై పోలీసులకు ఫిర్యాదు చేశాయి. దీనితో సరూర్‌నగర్ పోలీసులు కేసు నమోదు చేయడం చర్చనీయాంశమైంది.

బీజేపీ నేత చీకోటి ప్రవీణ్ స్పందిస్తూ క్షమాపణలు చెప్పాలని డిమాండ్ చేసారు. ఈ వివాదంపై ఆయన తీవ్రంగా స్పందించారు. రాజమౌళిని ఉద్దేశించి ఇలా వ్యాఖ్యానించారు

• “హిందువుల మనసులు దెబ్బతీసేలా మాట్లాడావు. వెంటనే క్షమాపణలు చెప్పాలి.”
• “హిందువులు నీ సినిమాలు చూడకపోతే నీ స్థాయి ఏమవుతుందో ఆలోచించు.”
• “దేవుళ్లను నమ్మకుంటే నాస్తికులతోనే సినిమాలు తీయి.”
• “అహంకారం చివరకు ఎలా పతనమవుతుందో నీ బాహుబలి సినిమాలోనే చూపించావు.”

చీకోటి ప్రవీణ్ మాట్లాడుతూ హిందూ సమాజం కోపం తెచ్చుకుంటే రాజమౌళి హీరో నుంచి జీరో అవుతారని ఆయన హెచ్చరించారు.

వారణాసి టైటిల్ పై మరో సమస్య (Varanasi Title Issue)

రాజమౌళి వ్యాఖ్యల వివాదం పూర్తిగా తగ్గకముందే మరో సమస్య ముందుకు వచ్చింది. వారణాసి టైటిల్ ఇప్పటికే రామబ్రహ్మ హనుమ క్రియేషన్స్ అనే సంస్థ వద్ద రిజిస్టర్ అయి ఉందని తెలిసింది.
నిర్మాత సి.హెచ్. సుబ్బారెడ్డి ఈ టైటిల్‌ను 2023లో రిజిస్టర్ చేసి, 2026 వరకు రీన్యూ కూడా చేశారు. దీంతో టైటిల్ హక్కులపై కూడా చర్చ మొదలైంది. రాజమౌళి టీమ్ ఈ విషయం ఎలా పరిష్కరిస్తుందో ఆసక్తిగా మారింది.

దేశవ్యాప్తంగా హైప్ - కానీ వరుస సమస్యలు

మహేష్ బాబు, ప్రియాంకా చోప్రా, పృథ్విరాజ్ సుకుమారన్ ప్రధాన పాత్రల్లో వస్తున్న వారణాసి పై దేశవ్యాప్తంగా భారీ ఆసక్తి ఉంది. టైటిల్ గ్లింప్స్ కూడా పెద్ద స్కేల్‌లో విడుదల చేశారు. అయితే ఈ వరుస వివాదాల ఎఫెక్ట్ ఇప్పుడు ఈ ప్రాజెక్ట్‌పై పడుతున్నట్టు కనిపిస్తోంది.

రాబోయే రోజుల్లో రాజమౌళి ఎలా స్పందిస్తారో చూడాలి, టైటిల్ సమస్య పరిష్కారం, హిందూ సంఘాల నిర్ణయం ఇవన్నీ ఈ సినిమా చుట్టూ చర్చను మరింత వేడెక్కించేలా కనిపిస్తున్నాయి.