AVM Productions: ఏవీఎం శరవణన్ నిర్మించిన తెలుగు, తమిళ్ హిట్ సినిమాలు ఇవే..!

AVM Productions: తమిళ సినిమా ప్రపంచంలో ఎంతో గౌరవం పొందిన లెజెండ్రీ నిర్మాత, ఏవీఎం ప్రొడక్షన్స్ అధినేత ఎం. శరవణన్ గారు ఇకలేరు. చెన్నైలో డిసెంబర్ 4, 2025న 86 ఏళ్ల వయసులో ఆయన కన్నుమూశారు. కొంతకాలంగా వయస్సుతో వచ్చిన ఆరోగ్య సమస్యలతో బాధపడుతున్నారు. ఆయన భౌతికకాయాన్ని అభిమానులు, సినీ ప్రముఖులు నివాళులు అర్పించేందుకు చెన్నై వడపళని లోని ఏవీఎం స్టూడియోలో ఏర్పాటు చేశారు.

ఏవీఎం వారసత్వాన్ని ముందుకు తీసుకెళ్లిన వ్యక్తి శరవణన్ గారు ఏవీఎం స్థాపకుడు ఏ.వి. మేయప్పన్ కుమారుడు. చిన్నప్పటి నుంచే స్టూడియో వాతావరణంలో పెరిగిన ఆయన, యువకుడిగా ఉన్నప్పుడే నిర్మాణ పనులలో చేరారు. 1979లో తండ్రి మరణించిన తర్వాత మొత్తం స్టూడియో, ప్రొడక్షన్ బాధ్యతలను ఆయన స్వయంగా చేపట్టారు. దాదాపు ఐదు దశాబ్దాల పాటు, స్టూడియోను ఎంతో కష్టపడి నడిపించారు. తమిళ సినిమా మార్పులు, ప్రేక్షకుల అభిరుచులు ఎలా మారినా, ఏవీఎంను నిలబెట్టినది శరవణన్ గారి విజన్ అని సినీ వర్గాలు చెబుతాయి.

తమిళ చిత్రసీమలో ఏవీఎం ప్రొడక్షన్స్ తనకంటూ ప్రత్యేక స్థానం సంపాదించుకుంది. ఆ స్థానం నిలబడటంలో శరవణన్ గారి పాత్ర ఎంతో గొప్పది. ఆయన పర్యవేక్షణలో వచ్చిన కొన్ని కీలక చిత్రాలు ఇవే

• యజమాన్ (1993)
• శక్తివేల్ (1994) 
• మిన్సారా కనవు (1997)
• తిరుపతి (2006)
• శివాజీ: ది బాస్ (2007)
• అయన్ (2009)

ఈ సినిమాలు మాత్రమే కాదు, ఆయన నిర్మాణ శైలి, కొత్త దర్శకులు, నటులను ప్రోత్సహించడం, మంచి కథలకు అవకాశం ఇవ్వడం వంటి లక్షణాలు పరిశ్రమలో ఆయనను ప్రత్యేకంగా నిలబెట్టాయి. ఏవీఎం స్టూడియో పేరు కేవలం తమిళనాట మాత్రమే కాదు, తెలుగులో కూడా గొప్ప గుర్తింపు సంపాదించింది. శరవణన్ గారి పర్యవేక్షణలో వచ్చిన ప్రముఖ తెలుగు చిత్రాలు.. 

• భక్త ప్రహ్లాద (1967)
• మూగ నొము (1969)
• ఆ ఒక్కటి అడక్కు (1992)

ఈ సినిమాలు తెలుగు ప్రేక్షకుల్లో మంచి ఆదరణ పొందాయి, ఏవీఎంను తెలుగు రాష్ట్రాలకు చేరువ చేశాయి. శరవణన్ గారు సినిమాల్లో ఎంత పెద్ద వ్యక్తినా, జీవనశైలి మాత్రం చాలా సాదాసీదాగా ఉండేది. ఎప్పుడూ తెల్ల షర్ట్, తెల్ల ప్యాంట్ వేసుకుని కనిపించేవారు. ఆయనను చూసిన వారు వెంటనే గుర్తించగలిగేవారు. ఈ సరళత, క్రమశిక్షణ, మాటపట్టుదల ఆయనను సినీ పరిశ్రమలో ఎంతో గౌరవనీయుడిని చేసింది.

తమిళంతో పాటు తెలుగు, హిందీ చిత్రాలూ నిర్మించి ఏవీఎం ఖ్యాతిని దేశవ్యాప్తంగా చాటారు. ఆయన నిర్మించిన కొన్ని ప్రముఖ చిత్రాలు.. 

• నానుమ్ ఒక పేన్ (1963) - జాతీయస్థాయిలో ప్రశంసలు పొందిన చిత్రం
• సంసారం అది మిన్సారం (1986) - కుటుంబ కథాచిత్రాల్లో ఒక క్లాసిక్
• మిన్సారా కనవు (1997) - సంగీతం, కథ, నటనకు  ప్రశంసలు
• శివాజీ: ది బాస్ (2007) - భారీ విజయం
• వేట్టైకారన్ (2009)
• అయన్ (2009)

ఇటీవలి కాలంలో ఆయన రోజువారీ పనుల నుంచి తగ్గినా, ఏవీఎం స్టూడియో తన ప్రత్యేక స్థానాన్ని కొనసాగించడంలో ఆయన మార్గదర్శకత్వం కీలకమైంది. స్టూడియో ఇప్పటికీ చెన్నైలో పెద్ద షూటింగ్ కేంద్రంగా నిలిచింది. శరవణన్ గారి మరణం దక్షిణ భారత చిత్రసీమకు పెద్ద నష్టం. ఐదున్నర దశాబ్దాలుగా ఏవీఎం పేరు నిలబెట్టిన ఆయన ఇకలేరన్న వార్త సినీ వర్గాలు, అభిమానులను దిగ్భ్రాంతికి గురిచేసింది.

ఫ్యాన్స్, సినీ ప్రముఖులు ఈ రోజు మొత్తం ఏవీఎం స్టూడియోకు చేరుకుని ఆయనకు చివరి నివాళి అర్పిస్తున్నారు. అంత్యక్రియల వివరాలు త్వరలో తెలియనున్నాయి. దక్షిణ భారత సినిమాను ప్రభావితం చేసిన అరుదైన నిర్మాతగా శరవణన్ గారి పేరు ఎప్పటికీ నిలిచి ఉంటుంది.