Barabar Premistha Review: 'బరాబర్ ప్రేమిస్తా' మూవీ రివ్యూ.. యాటిట్యూడ్ స్టార్‌ హిట్ కొట్టాడా..?

Barabar Premistha Review: బుల్లితెర మెగాస్టార్ ప్రభాకర్ కొడుకు, యాటిట్యూడ్ స్టార్‌గా గుర్తింపు తెచ్చుకుంటున్న చంద్రహాస్ హీరోగా నటించిన తాజా చిత్రం బరాబర్ ప్రేమిస్తా.. ఇప్పటికే వివాదాలతో వార్తల్లో నిలిచిన ఈ సినిమా, ఈ శుక్రవారం ప్రేక్షకుల ముందుకు వచ్చింది. వివాదాల ప్రభావం సినిమాపై పడిందా? లేక సినిమా ఆడియెన్స్‌ను మెప్పించిందా? ఇప్పుడు పూర్తి వివరంగా చూద్దాం.

సినిమా వివరాలు

మూవీ: బరాబర్ ప్రేమిస్తా
హీరో: చంద్రహాస్
హీరోయిన్: మేఘనా ముఖర్జీ
ఇతర నటులు: అర్జున్ మహీ, మురళీధర్ గౌడ్, మధునందన్, మీసాల లక్ష్మణ్, అభయ్ నవీన్, రాజశేఖర్ అనిగి, కీర్తీ లతా గౌడ్, సునీతా మనోహర్ తదితరులు
దర్శకుడు: సంపత్ రుద్ర
నిర్మాతలు: గేద చందు, గాయత్రి చిన్ని, వెంకటేశ్వరరావు
సంగీతం: ఆర్ ఆర్ ధృవన్
కథ: తిరుపతి
బ్యానర్లు: సీ క్రియేషన్స్, ఏవీఆర్ మూవీ వండర్స్
విడుదల తేదీ: 2026, ఫిబ్రవరి 6

కథ ఏమిటంటే…

ఆదిలాబాద్ జిల్లాలోని రుద్రారం అనే గ్రామంలో ధర్మన, కర్మన అనే రెండు వర్గాలు ఉంటాయి. ఎన్నో ఏళ్లుగా వీరి మధ్య గొడవలు జరుగుతుంటాయి. కులం, పరువు అన్నవి అక్కడి పెద్దలకు చాలా ముఖ్యమైనవి.

కర్మన వర్గానికి చెందిన సర్పంచ్ నారాయణ కూతురు బుజ్జమ్మ, ధర్మన వర్గానికి చెందిన యువకుడు చందు మధ్య మొదట గొడవలు జరుగుతాయి. ఆ తర్వాత అదే గొడవ ప్రేమగా మారుతుంది. తమ ప్రేమ విషయం బయటపడితే ప్రాణాలకే ప్రమాదమని భావించి ఇద్దరూ కేరళకు పారిపోతారు.

అక్కడ ఏం జరిగింది? ఇద్దరూ ఎందుకు విడిపోయారు? తిరిగి ఊరికి ఎందుకు వచ్చారు? ఈ ప్రేమ కథ ఊర్లో మార్పుకు ఎలా కారణమైంది? కుల గొడవలకు ముగింపు ఎలా వచ్చింది? అన్నదే మిగతా కథ.

సినిమా ఎలా ఉందంటే…

కుల వివక్ష, పరువు హత్యల నేపథ్యంతో ఇప్పటికే చాలా సినిమాలు వచ్చాయి. అదే కోవలోకి వచ్చే సినిమానే బరాబర్ ప్రేమిస్తా. అయితే ఇందులో కథను సరదాగా, కామెడీగా చెప్పే ప్రయత్నం చేశారు.

మొదటి భాగంలో ప్రేమ, గొడవలు, ఫన్ బాగా వర్కౌట్ అయ్యాయి. హీరో-హీరోయిన్ మధ్య సన్నివేశాలు ఆకట్టుకుంటాయి. ఇంటర్వెల్ ట్విస్ట్ ఆసక్తికరంగా ఉంటుంది. రెండో భాగంలో ఊరి గొడవలు, పోలీసుల హడావుడి కొంత నవ్విస్తాయి.

క్లైమాక్స్‌లో మాత్రం పరువు, కులం అనే అంశాన్ని ఎమోషనల్‌గా చూపించారు. సందేశం బాగానే ఉన్నా, కొన్ని సన్నివేశాలు రెగ్యులర్‌గా అనిపిస్తాయి.

ప్లస్ పాయింట్లు

• ప్రేమ కథ, ఫన్ సీన్లు
• కొన్ని ట్విస్టులు
• మీసాల లక్ష్మణ్ ఇచ్చిన షాక్
• ఎమోషనల్ క్లైమాక్స్
• కుల వివక్షపై మెసేజ్

మైనస్ పాయింట్లు

• కామెడీ కొన్ని చోట్ల వర్క్ అవ్వలేదు
• ప్రేమ గొడవలు వీక్ గా అనిపిస్తాయి
• కుల హత్యల తీవ్రత ప్రభావవంతంగా కనిపించదు
• కొన్ని సీన్లు లాగినట్టు ఉంటాయి

నటీనటుల నటన

చంద్రహాస్ ఈ సినిమాలో గత సినిమాల కంటే మెరుగ్గా నటించాడు. కానీ ఇంకా నిలకడ అవసరం. మేఘనా ముఖర్జీ గ్రామీణ అమ్మాయిగా బాగా సరిపోయింది. మురళీధర్ గౌడ్ సర్పంచ్ పాత్రలో ఆకట్టుకున్నాడు. అభయ్ నవీన్, మీసాల లక్ష్మణ్ తమ పాత్రల్లో బాగా చేశారు. మిగతా నటులు ఓకే అనిపించారు.

టెక్నికల్ అంశాలు

ఆర్ ఆర్ ధృవన్ సంగీతం ఫర్వాలేదు. బ్యాక్ గ్రౌండ్ మ్యూజిక్ సినిమాకు ప్లస్ అయ్యింది. వైఆర్ శేఖర్ కెమెరా వర్క్ బాగుంది. గ్రామీణ వాతావరణం సహజంగా కనిపిస్తుంది. ఎడిటింగ్ ఇంకాస్త బాగా ఉండాల్సింది. దర్శకుడు సంపత్ రుద్ర కథను బాగానే నడిపించాడు. అనుకున్న కథను స్పష్టంగా చెప్పాడు.

కన్నీళ్లు పెట్టుకున్న ప్రముఖ తెలుగు సీరియల్ నటుడు ప్రభాకర్ కుమారుడు చంద్రహాస్..#attitudestar#ChandraHass#emotional#Viralvideo#RTVpic.twitter.com/LTSUhbTvTS

— RTV (@RTVnewsnetwork) February 7, 2026

చంద్రహాస్ ఎమోషనల్ కామెంట్స్.. Attitude Star Chandrahas Emotional

సినిమా రిలీజ్ రోజు థియేటర్‌లో సినిమా చూసిన చంద్రహాస్ భావోద్వేగానికి(Attitude Star Chandrahas Emotional) లోనయ్యాడు. చివరి 10 నిమిషాల్లో తనకు కన్నీళ్లు వచ్చాయని చెప్పాడు. ఇటీవల జరిగిన పాట వివాదం వల్ల సినిమా పై నెగెటివ్ ఎఫెక్ట్ పడుతుందేమోనని భయపడ్డానని అన్నాడు.

ప్రీ రిలీజ్ ఈవెంట్‌లో చంద్రహాస్ ఒక పాట పాడాడు. అందులో కొన్ని అసభ్య పదాలు రావడంతో అతడిపై ట్రోలింగ్ జరిగింది. ఈ విషయం సినిమా ప్రమోషన్‌పై ప్రభావం చూపుతుందేమో అని చిత్రబృందం ఆందోళన చెందింది.

ఫైనల్‌గా…

బరాబర్ ప్రేమిస్తా సరదాగా సాగుతూ కుల వివక్షపై సందేశం చెప్పే సినిమా. పూర్తి స్థాయిలో మెప్పించకపోయినా, ఒకసారి చూడదగిన చిత్రంగా నిలుస్తుంది.