Allu Arjun Protocol: ఎందుకు కళ్లలోకి చూడకూడదు? అల్లు అర్జున్ '42 పాయింట్స్' ప్రోటోకాల్ వైరల్..!

Allu Arjun Protocol: ఐకాన్ స్టార్ అల్లు అర్జున్ ప్రస్తుతం దేశవ్యాప్తంగా భారీ గుర్తింపు పొందిన నటుడు. స్టైల్, డాన్స్, నటనతో ఆయనకు ప్రత్యేకమైన ఇమేజ్ ఏర్పడింది. ముఖ్యంగా Pushpa 2 విజయంతో ఆయన క్రేజ్ మరింత పెరిగింది. అయితే ఈసారి సినిమా కారణంగా కాదు, ఆయనను కలవడానికి ఉన్నాయని చెబుతున్న కొన్ని నియమాల కారణంగా ఆయన పేరు సోషల్ మీడియాలో ట్రెండ్ అవుతోంది.

వైరల్ వీడియోతో మొదలైన చర్చ

ఇటీవల ఒక పాడ్‌కాస్ట్‌లో మాట్లాడిన ఒక మీడియా సేల్స్ లీడర్ కావేరీ బారువా, అల్లు అర్జున్‌ను కలవడానికి ముందు తమకు 42 నిబంధనలతో కూడిన ఒక లిస్ట్ ఇచ్చారని చెప్పింది. ఈ వ్యాఖ్యలు బయటకు రాగానే సోషల్ మీడియాలో పెద్ద చర్చ మొదలైంది. ఈ నియమాలనే నెటిజన్లు “అల్లు అర్జున్ ప్రోటోకాల్” అని పిలవడం ప్రారంభించారు.

42 strict protocol rules to meet Icon Star Allu Arjun.
No eye contact. No handshake. 😬😬 pic.twitter.com/DZ3cUDyhCS

— Pa1 పటేల్ 🇮🇳 (@Pa1_Patel23) February 10, 2026

ఆమె చెప్పిన ప్రకారం ఆ లిస్ట్‌లో 20కి పైగా కఠినమైన షరతులు ఉన్నాయట. ముఖ్యంగా అందరినీ ఆశ్చర్యపరిచిన విషయం “సర్ కళ్లలోకి నేరుగా చూడకూడదు” అనే నిబంధన. అలాగే ఆయన అనుమతి లేకుండా హ్యాండ్‌షేక్ చేయకూడదట. ఫోన్లు తీసుకురావద్దు, ముందుగా అనుమతించిన ప్రశ్నలే అడగాలి వంటి సూచనలు ఉన్నాయని ఆమె తెలిపింది. ఏ నియమం తప్పినా మీటింగ్ వెంటనే ఆపేస్తారట. అక్కడ ఉన్న సిబ్బంది కూడా చాలా నిశ్శబ్దంగా ఉండాలని సూచిస్తారట.

ఇంకా ఆమె చెప్పిన విషయం ఏమిటంటే, దక్షిణాది స్టార్‌లు సాధారణంగా పెద్ద టీమ్‌తో వస్తారని, అల్లు అర్జున్ విషయంలో అయితే “మేనేజర్‌కు మేనేజర్‌కు మేనేజర్” వరకూ ఒక పెద్ద వ్యవస్థ ఉంటుందని అన్నారు. “ఎందుకు కళ్లలోకి చూడకూడదు?” అని అడిగితే, “అది రూల్” అని మాత్రమే సమాధానం ఇచ్చినట్లు ఆమె చెప్పింది.

అయితే ఇప్పటివరకు ఈ నిబంధనలపై ఎలాంటి అధికారిక ఆధారం బయటకు రాలేదు. అల్లు అర్జున్ గానీ, ఆయన టీమ్ గానీ ఎలాంటి ప్రకటన చేయలేదు. సోషల్ మీడియాలో జరుగుతున్న చర్చ మొత్తం ఆ పాడ్‌కాస్ట్‌లో చెప్పిన మాటల ఆధారంగానే ఉంది. కాబట్టి ఈ నియమాలు నిజమా? లేక అపోహలా? అన్నది ఇంకా స్పష్టంగా తెలియాల్సి ఉంది.

అభిమానుల మధ్య రెండు వాదనలు

ఈ విషయం బయటకు రావడంతో అభిమానుల మధ్య భిన్న అభిప్రాయాలు వ్యక్తమవుతున్నాయి. కొంతమంది అభిమానులు పెద్ద సెలబ్రిటీలకు ఇలాంటి గైడ్‌లైన్స్ సాధారణమే అంటున్నారు. భద్రత, ప్రైవసీ కోసం ఈ విధమైన నియమాలు అవసరమని చెబుతున్నారు. విదేశీ స్టార్‌లకు కూడా ఇలాంటి ప్రోటోకాల్ ఉంటుందని ఉదాహరణలు ఇస్తున్నారు. ఒత్తిడి తగ్గించుకోవడానికి, ప్రొఫెషనల్‌గా మీటింగ్‌లు నిర్వహించడానికి ఇవి ఉపయోగపడతాయని వారు భావిస్తున్నారు.

మరోవైపు చాలా మంది నెటిజన్లు అసహనం వ్యక్తం చేస్తున్నారు. సినిమా నటులు అభిమానులకు దగ్గరగా ఉండాలని వారు అంటున్నారు. “కళ్లలోకి చూడకూడదు” లాంటి నిబంధనల పై అసహనం వ్యక్తం చేస్తున్నారు. కొందరు ఈ నిర్ణయాలు అల్లు అర్జున్ వ్యక్తిగతంగా కాకుండా పీఆర్ టీమ్ తీసుకుని ఉండొచ్చని కూడా అనుమానం వ్యక్తం చేస్తున్నారు.

ఇక మరో ముఖ్యమైన విషయం ఏమిటంటే, ఇటీవల Pushpa 2 ప్రమోషన్ల సమయంలో జపాన్‌లో జరిగిన ఈవెంట్స్‌లో అల్లు అర్జున్ అభిమానులతో ఎంతో స్నేహపూర్వకంగా మెలిగిన వీడియోలు సోషల్ మీడియాలో వైరల్ అయ్యాయి. టోక్యోలో జరిగిన కార్యక్రమాల్లో ఆయన అభిమానులతో ఫొటోలు దిగుతూ, చిరునవ్వుతో పలకరిస్తూ కనిపించారు.

ఒక వీడియోలో ఒక అభిమాని భావోద్వేగానికి లోనై కన్నీళ్లు పెట్టుకున్నప్పుడు, అల్లు అర్జున్ స్వయంగా ఆమె దగ్గరకు వెళ్లి మాట్లాడి, హ్యాండ్‌షేక్ చేసి ధైర్యం చెప్పిన దృశ్యాలు కూడా కనిపించాయి. ఈ వీడియోలు వైరల్ కావడంతో “నో ఐ కాంటాక్ట్, నో హ్యాండ్‌షేక్” వంటి నియమాలపై మరింత సందేహాలు వ్యక్తమవుతున్నాయి.

ప్రస్తుతం సోషల్ మీడియాలో వినిపిస్తున్న “42 నియమాలు” కథనాలకు స్పష్టమైన ఆధారం లేదు. అధికారికంగా ఎలాంటి ధృవీకరణ రాకపోవడంతో ఇవి అపోహలే కావచ్చని కొందరు భావిస్తున్నారు. మరోవైపు కొందరు మాత్రం పెద్ద స్టార్‌లకు ఇలాంటి నియమాలు సహజమే అంటున్నారు.

అసలు నిజం ఏంటో తెలుసుకోవాలంటే అల్లు అర్జున్ లేదా ఆయన టీమ్ నుండి అధికారిక ప్రకటన రావాల్సి ఉంది. అప్పటివరకు ఈ విషయం సోషల్ మీడియాలో చర్చగా కొనసాగుతూనే ఉంటుంది.