Naresh65: అల్లరి నరేష్‌తో నాగ చైతన్య... కొత్త సినిమాతో ఇక నవ్వుల పండగే !

హాస్య మూవీస్, అన్నపూర్ణ స్టూడియోస్ బ్యానర్స్ సంయుక్తంగా నిర్మిస్తున్న ఈ సినిమా నేడు పూజ కార్యక్రమాలతో ఘనంగా ప్రారంభించారు. అన్నపూర్ణ స్టూడియోస్ లో జరిగిన ఈ కార్యక్రమానికి అక్కినేని నాగచైతన్య ముఖ్య అతిథిగా హాజరయ్యారు.

'కామెడీ గోస్ కాస్మిక్' అనే ట్యాగ్ లైన్ తో దీనిని అనౌన్స్ చేశారు. అయితే ఈ చిత్రంలో ఇందులో కామెడీతో పాటు ఫాంటసీ అంశాలు కూడా ఉంటాయని చిత్రబృందం వెల్లడించింది

ముఖ్య అతిథిగా హాజరైన నాగచైతన్య ముహూర్తం షాట్‌కు క్లాప్ కొట్టగా, ప్రముఖ డైరెక్టర్ బాబీ కెమెరా స్విచ్ ఆన్ చేశారు. డైరెక్టర్ వి.ఐ. ఆనంద్ ఫస్ట్ షాట్ కి దర్శకత్వం వహించారు.

వశిష్ట, రామ్ అబ్బరాజు, విజయ్ కనకమేడల వంటి దర్శకులు స్క్రిప్ట్‌ను అందజేశారు.

ఫాంటసీ కామెడీ డ్రామాగా రూపొందుతున్న ఈ చిత్రానికి చంద్రమోహన్ దర్శకత్వం వహిస్తున్నారు. రామ్ రెడ్డి సినిమాటోగ్రాఫర్ గా చేతన్ భరద్వాజ్ సంగీత దర్శకుడిగా పనిచేస్తున్నారు.

అయితే ఈ చిత్రంలో వెన్నెల కిషోర్, నరేష్ వీకే, శ్రీనివాస్ రెడ్డి, మురళీధర్ గౌడ్ వంటి స్టార్ కమెడియన్స్ కీలక పాత్రల్లో నటించడం ప్రేక్షకులలో మరింత ఆసక్తిని పెంచుతోంది. వీరి కామెడీ టైమింగ్ ఏ లెవెల్లో ఉంటుందో చెప్పాల్సిన పనిలేదు.

ప్రస్తుతం నరేష్ 'ఆల్కహాల్' సినిమాతో బిజీగా ఉండగా.. ఈ సినిమా త్వరలోనే సెట్స్ పైకి వెళ్లనుంది. ఇది అల్లరి నరేష్ కెరీర్ లో మరో మంచి కామెడీ ఎంటర్ టైనర్ గా నిలుస్తుందని సినీ వర్గాలు భావిస్తున్నాయి.