విపక్షాల భేటీకి శరద్ పవార్ దూరం?..కారణం ఇదేనా..!!

కర్ణాటక రాజధాని బెంగళూరులో నేటి నుంచి రెండు రోజుల పాటు ఉమ్మడి ప్రతిపక్షాల సమావేశం ప్రారంభం కానుంది. నేషనలిస్ట్ కాంగ్రెస్ పార్టీ (ఎన్‌సిపి) అధినేత శరద్ పవార్ ఈరోజు ఈ సమావేశానికి హాజరుకావడం లేదు . అయితే రేపు జరిగే సమావేశానికి ఆయన హాజరుకానున్నారు. అంతకుముందు జూన్ 23న పాట్నాలో జరిగిన ప్రతిపక్ష పార్టీల సమావేశానికి కూడా పవార్ హాజరయ్యారు. రేపు జరిగే సమావేశానికి శరద్ పవార్ , ఆయన కూతురు, లోక్‌సభ ఎంపీ సుప్రియా సూలే హాజరుకానున్నారు. ఈ మేరకు పవార్ వర్గం అధికార ప్రతినిధి తెలిపారు.

అయితే ఉమ్మడి విపక్షాల సమావేశానికి ఎన్సీపీ అధినేత ఎందుకు హాజరు కావడం లేదన్న దానిపై ఎలాంటి కారణం వెల్లడించలేదు. 2024 లోక్‌సభ ఎన్నికల్లో బీజేపీని ఢీకొట్టేందుకు ఐక్య ప్రతిపక్షాన్ని ఏర్పాటు చేసే ప్రయత్నాల్లో నిమగ్నమైన అగ్రనేతల్లో పవార్ ఒకరు. బెంగళూరులో కాంగ్రెస్ పిలుపునిచ్చిన సమావేశానికి 25 పార్టీలను ఆహ్వానించారు. ఈ సమావేశానికి కాంగ్రెస్ మాజీ అధ్యక్షురాలు సోనియా గాంధీ, రాహుల్ గాంధీ కూడా హాజరయ్యే అవకాశం ఉంది. ఈ సమావేశంలో 10 కొత్త పార్టీలను ఆహ్వానించారు. సమావేశానికి సంబంధించిన ఏర్పాట్లను పర్యవేక్షించే బాధ్యతను కర్ణాటక ఉప ముఖ్యమంత్రి డీకే శివకుమార్‌కు అప్పగించారు.

సోనియా గాంధీ, రాహుల్ గాంధీ, మల్లికార్జున్ ఖర్గే ముగ్గురూ కాంగ్రెస్ పక్షాన హాజరుకానున్నారు. నితీష్ కుమార్, లాలూ యాదవ్, తేజస్వీ యాదవ్ తోపాటు. మమతా బెనర్జీ, ఉద్ధవ్ ఠాక్రే కూడా ఈ సమావేశానికి హాజరవుతున్నారు. అఖిలేష్ యాదవ్‌తో పాటు జయంత్ చౌదరి కూడా రానున్నారు. తమిళనాడు సీఎం ఎంకే స్టాలిన్, జార్ఖండ్ సీఎం హేమంత్ సోరెన్, జమ్మూ కాశ్మీర్ మాజీ ముఖ్యమంత్రులు ఫరూక్ అబ్దుల్లా, మెహబూబా ముఫ్తీ బెంగళూరులో హాజరుకానున్నారు. సీపీఐఎం సీతారాం ఏచూరి, సీపీఐ నుంచి డి.రాజా కూడా ఈ భేటీలో ఉంటారు.

ప్రతిపక్షాల సమావేశం ఎజెండా:

-2024 లోక్‌సభ ఎన్నికల కోసం ఉమ్మడి కనీస కార్యక్రమం ముసాయిదా రూపకల్పన, కూటమి కోసం కమిటీని ఏర్పాటు చేయడం మొదటి ఎజెండా.

-వివిధ పార్టీల సదస్సులు, ర్యాలీల దృష్ట్యా రెండు పార్టీల మధ్య విభేదాలను పరిష్కరించడమే రెండో ఎజెండా.

-మూడో ఎజెండా సీట్లకు సంబంధించినదని, ఇందులో రాష్ట్రాల ప్రాతిపదికన సీట్ల పంపకం అంశంపై చర్చించనున్నారు.

-నాలుగో ఎజెండా ఈవీఎంలకు సంబంధించినదని, దీనిపై నేటి సమావేశంలో చర్చించి ఎన్నికల కమిషన్‌కు సూచనలు చేసేలా పాయింట్లను రూపొందించనున్నారు.

- ఇప్పుడు కూటమి పేరు పీడీఏ. ఈ కూటమికి ఎలాంటి కొత్త పేరు పెట్టాలనేది కూడా ఈరోజు చర్చనీయాంశం కానుంది.

-దీంతో పాటు ఈ కూటమికి ఆఫీస్ ఫిక్స్ చేయడంపై ఈ సమావేశంలో చర్చ జరగనుంది.